У чым сіла, брат? Гэта пытанне, як правіла, гучыць тады, калі чалавек па філасоўску спрабуе ўзглянуць на жыццёвую мітусню і сам, шукаючы свайго месца пад сонцам, імкнецца за штосьці ўхапіцца, абы толькі не быць змытым плыняй пераменаў. Кожны сам вызначае свой полюс прыцяжэння – крыніцу сілы якой падпарадкоўваецца. … Учора, на 23 дзень грамадска-палітычнага крызісу ў Беларусі, што распачаўся ўвечары ў дзень выбараў 9га жніўня 2020г, мы сталі сведкамі беспрэцэдэнтнага здарэння. Грамадзяніна РБ прадстаўнікі дзяржаўнай улады не ўпусцілі на Радзіму. На памежным пераходзе ў Кузніцы, памежнікі не патлумачылі свайго рашэння. ... Аднак, дакладна вядома, што тым грамадзянінам, канстытуцыйныя правы каторага былі яўна парушаны, з’яўляецца мітрапаліт Мінска-магілёўскі Старшыня Канферэнцыі Каталіцкіх Біскупаў у Беларусі арцыбіскуп Тадэвуш Кандрусевіч. Вось так... Безумоўна, гэта навіна шакавала ўвесь цывілізаваны свет. Аднак, яна цалкам гарманічна ўпісалася ў беларускую рэчаіснасць. Чаму? А таму. Таму, што ў Беларусі супрацьстаянне паміж грамадзянскай супольнасцю і ўладай плаўна перарасло ў вайну.  Вайна – гэта крах спакою, так кажа Сацыяльнае Вучэнне Касцёла. (КСВК 497). Ну, а калі вайна, то парушэнне правоў чалавека становіцца нормай. Каму як не беларусам добра ведаць і памятаць пра несправядлівы прынцып усёдазволенасці, які канцэнтруецца ў словах “вайна ўсё спіша.” А таму, канешне, здзіўляцца не прыходзіцца. У нас жа і не такое ўжо было. Мы за апошнія дні шмат чаго пабачылі, каб сёння здзіўляцца чарговаму прабіццю дна беззаконня, дзеяннямі тых, хто павінен стаяць на ахове Закона. Мы бачылі, як сілавікі ва ўпор на камеры журналістаў расстрэльвалі мірных грамадзян, пры гэтым былі і смяротныя выпадкі. Бачылі, як прыцэльна стралялі па саміх журналістах. Чулі сведчанні тысячы людзей аб катаваннях і гвалце супрацоўнікамі МУС. І пры гэтым не чулі і не бачылі, каб па фактах зафіксаваных грамадствам злачынстваў была ўзбуджана хоць бы адна крымінальная справа! НІВОДНАЙ не было. Так чаму ж здзіўляцца, што каталіцкі мітрапаліт... пра насілле тут👍👍👍 https://youtu.be/Qd2do23dR6A  Канешне, гэтае рашэнне ўлады - палітызаванае. Прычынай таму ёсць хрысціянская сумленная пазіцыя мітрапаліта. ... (глядзі пра Рубікон тут https://youtu.be/SG1vPc35aNE). У выніку мітрапаліту проста не дазволілі вярнуцца ў краіну. Як казалі ў СССР: “няма чалавека – няма праблемы”. У прынцыпе, з мітрапалітам яшчэ някепска абышліся, бо маглі і пасадзіць. “Стоп, стоп. За што пасадзіць?” А ні за што. Проста так. Проста пасадзіць. Бо за што сядзяць сёння палітвязні і сотні арыштаваных? Ні за што. Проста сядзяць, бо так вырашала ўлада. Гэта Беларусь. У ёй той хто не вінаваты - сядзіць, а той у каго рукі ў крыві і калі не сам з’яўляецца злачынцам, то, па меньшай меры, саўдзельнікам, аддае загады, каго садзіць. Тут закон не працуе. ... Інцыдэнт з мітрапалітам – беспрэцэндэнтны. Хаця ў гісторыі было ўжо і такое. Напрыклад, святар Уладзіслаў Чарняўскі ў 1967 не меў бы права вярнуцца ў СССР, калі прыняў бы біскупскія пасведчанні на жаданне пантыфіка Паўла VI. Зыгмунт Лазінскі біскуп Мінскі пасля вызвалення з Маскоўскай Бутыркі і лячэння ў Польшчы, ў 1922г.,не змог вярнуцца ў Беларусь. Улада не дала на тое згоды. Паралелі паміж камуністычным таталітарным рэжымам і аўтаратарным рэжымам Лукашэнкі напрошваюцца самі. ... Забарона мітрапаліту Кандрусевічу вярнуцца ў Беларусь - гэта такая падзея, якая становіцца момантам ісціны шмат для каго і перадусім для ўсіх хрысціянаў, незалежна ад іх канфесійнай прыналежнасці. Напрыклад, і для братоў праваслаўных. Мне асабіста цікава, як адрэагуе на дадзены інцыдэнт праваслаўны новы мітрапаліт Веніямін і ці не заступіцца за каталіцкага мітрапаліта? Мы ж, католікі і праваслаўныя – неканкурэнты паміж сабой. Мы вызнаўцы адной хрысціянскай веры. Тут, калі не бароніш закону і чалавека, адразу становішся сам саўдзельнікам беззаконня. І дзелячыся з Вамі сваімі думкамі, сам малюся, каб у нас, ва ўсіх хрысціянаў, хапіла мудрасці разам бараніць Каталіцкага мітрапаліта. Бо гэта не Кандрусевіч патрабуе абароны, але кіраўнік Касцёла ў Беларусі, а значыць увесь Касцёл. Гэта не Касцёл патрабуе абароны, але ўсе канфесіі хрысціянскія ад яўнага ўмяшальніцтва рэжыму ва ўнутраныя справы хрысціянскіх супольнасцяў. Зрэшты, гэта не хрысціяне патрабуюць абароны сёння, бо Хрысціянскія Цэрквы бароняць свабоду і годнасць кожнага беларуса, але кожны чалавек у нашым грамадстве сёння патрабуе абароны. І бачна мы ўсе разам, і Касцёл таксама, робім гэта добра, калі аўтарытарны рэжым убачыў сабе пагрозу ў асобе мітрапаліта. Убачыў у ім варожую сілу. З якой не дае рады справіцца ўвесь сілавы блок краіны разам з арміяй праплочаных хлусьлівых прапагандыстаў і ідэолагаў. Так „у чым сіла, брат?”. Сіла ў праўдзе. Праўда, якая гучыць з вуснаў прапаведніка, мацней за ўсё палкі амапу. Ад слоў праўды не схаваешся з аўтаматам у руках за спінамі ўзброеных салдат. Праўда – вызваляе. Перамога Праўды і Закону над хлуснёй і беззаконнем усё бліжэй.