"Добры дзень. Паважаны ксёндз Вячаслаў,ці маглі б Вы выказацца наконт нунцыя і паціскання далоні кравапійцы. А то ФБ такія глупствы гаварыць. Дзякуй." Святлана Ш. Я магу выказацца. Аднак папярэджваю, маё выказванне не з’яўляецца афіцыйнай пазіцыяй Касцёла ў Рэспубліцы Беларусь. І вядома, пазіцыю Ватыкана мае агучваць Нунцыятура – дыпламатычнае прадстаўніцтва ў Мінску, а не ксёндз Барок. Так, сёння 3 лістапада 2020 г. Апостальскі нунцы арцыбіскуп Антэ Ёзіч уручыў даверчыя граматы. Партал catholic.by не кажа каму. Партал vaticannews.va інфармуе, што граматы ўручаныя нейкаму Аляксандру Лукашэнка. Афіцыйныя інфармацыйныя каталіцкія рэсурсы не ўдакладняюць, хто такі той загадкавы Аляксандр Лукашэнка і што супольнага мае з краінай Рэспубліка Беларусь. Фотаздымкаў гэтага таямнічага чалавека на парталах таксама няма. Аднак, у іншых крыніцах, я бачыў фотаздымкі, на якіх быў сапраўды нунцый і Лукашэнка, які некалі ў 1994г быў абраны на Прэзыдэнта Рэспублікі Беларусь. Як кажуць некаторыя аналітыкі, яго легітымнасць скончылася пасля разгрому парламента ў красавіку 1995г. Гэта той момант, калі Васіль Быкаў напісаў у Народнай Волі артыкул пад назвай: “Краінай кіруе хунта”. Ну, а некаторыя сцвярджаюць, што легітымнасць яго ўлады закончыцца 5 лістапада 2020г. Бо тут вядома ўсім, што апошнія прэзыдэнцкія выбары адбыліся з яўнымі парушэннямі, і усе выбары –гэта адна яўная фальсіфікацыя. Доказам таму ёсць таксама тайная інаўгурацыя, аднак, самаінаўгурацыя ніяк не даказвае легітымнасці. Тут https://youtu.be/u1JC9N6_y6U 👍Самаінаўгурацыя і далейшы дыялог у духу хрысціянства.) Вось тут, бадай, і крыецца прычына таямнічасьці асобы Лукашэнка ў каталіцкіх СМІ. Бо ён ужо не прэзыдэнт краіны, таму што згубіў або губляе легітымнасць. І гэта разумее не толькі Беларускі народ але і Ватыкан. Але ж таксама ўсе разумеюць, што прынамсі 6 разоў на тыдзень, апроч нядзелі, ён хоць і нелігітымны, пакуль мае фактычную ўладу. У нядзелю беларусы, праз мірныя маршы, дэманструюць, што ўлада ёсць у народа. Вось таму, каб нейкім чынам пасол Ватыкана мог працаваць у Беларусі, і адбылася гэтая, хіба больш фармальная, чым істотная працэдура ўручэння даверчых грамат, таму, хто лічыцца главой краіны, бо фактычны дыпламат пачынае працаваць пасля ўручэння грамат МЗС. Уручэнне даверчых грамат не гаворыць пра прызнанне ці не прызнанне паслом легітымнасьці нейкага кіраўніка краіны. Уручэнне даверчай граматы паслом, гэта такое ж прызнанне Лукашэнка, як і прызнанне легітымнасці рэжыму калі на мяжы памежніку паказваеш свой пашпарт. ... Наконт пацісканя рукі… ( Б’ю ў звон, пакуль б’юць людзей. Вы - якія маеце ўладу прагулялі. Сыходзьце. Глядзі https://youtu.be/28al6ZYt8Vg✌👍 Так, Вы не памыляецеся ў сваім пытанні, гаворачы, што нунцый ўсціскаў далонь таго, чые рукі ў крыві. Зрэшты, Лукашэнка сам да такой віны неаднаразова прызнаваўся - што аддаваў асабіста загады, выкананне каторых прыводзіла да праліцця крыві мірных грамадзянаў. Да таго ж, гэтыя загады, маім меркаваннем, не адпавядалі заканадаўству Беларусі. У кантэксце сказанага у папярэдняй часткі адказу, можна зразумець, чаму нунцый зрабіў так, а не інакш і паціснуў крывавую далонь. Напэўна хацелася б пачуць усім нам наколькі такія дзеянні суадносяцца з мараллю, адпавядаюць этыцы міжнародных адносін і, наогул, хрысціянскім паводзінам. Так вось, пра этыку міжнародных адносін я не хацеў бы гаварыць. А вось пра згоднасць учынка, калі выпіваецца келіх віна з чалавекам, які ў вязьніцах трымае тысячы людзей за палітычныя і рэлігійныя перакананні, можна паразважаць, на колькі яно пасуе хрысціяніну. Ведаеце, мне на думку прыходзіць Хрыстос, які спажываў Пасху і піў віно са здраднікам Юдам, ды пасля дазволіў таксама Юду не тое, што далонь праціснуць сваю, але, нават, пацалаваць Сябе. Евангелле кажа дакладна, навошта гэта рабіў Хрыстос. Думаю, не так важна, што адбылося сёння ў Мінску, і сведкамі чаго мы сталіся, але больш істотна тое, што адбываецца тады, калі камеры СМІ выключаныя, і чаго мы не бачым. Лукашэнка, вядома, хлусіць і падманвае, хоць бы і тады, калі ўчора заявіў на камеру, што Настаяцель Каталіцкага Касцёла ездзіў у Варшаву за інструкцыямі, каб разваліць Беларусь. Абвінавачвае мітрапаліта. Гэта вядома лухта. Бо калі не лухта, то ў мяне ўзнікае пытанне, чаму мітрапаліта Кандрусевіча, як ворага Беларусі, праваахоўныя органы не затрымалі і не асудзілі? Вось размову Майка і Ніка спецслужбы праслухалі, а мітрапаліта ўпусцілі... А калі вось лухта тое што я кажу, значыць і Лукашэнка хлусіць. https://youtu.be/wHQU1pKtHh8 тут пра У чым сіла, брат? Мітрапаліта Тадэвуша Кандрусевіча не пусцілі ў Беларусь.✌