#Акрэсціна - #Курапаты. #Ніколі_зноў. | Адкуль узялася такая паралель супастаўлення дзвюх рэчаіснасцяў? І чаму хрысціяне спрабуюць злучыць гэтыя дзве розныя кропкі, ланцугом пакаяння ў адну лінію і тым самым аб’яднаць у адну рэчаіснасць? Курапаты – гэта сімвал апагею зла камуністычнага антычалавечага рэжыму ХХ ст. Акрэсціна – гэта сімвал сучаснага аўтарытарнага рэжыму. Ён хлуслівы і беззаконны. Заточаны на прыніжэнне годнасці чалавека і насілле. У ім катаваньне, здзек, забойства становіцца нормай. Выбух насілля сёння - гэта прамое наступства праяўленага насілля ў мінулым стагоддзі. Сённяшняя трагедыя “Акрэсціна” сталася магчымай, бо не было сапраўднага пакаяння за злачынствы камунізма, за “Курапаты". Гісторыя Курапатаў сведчыць, што мы, беларусы, хоць і адзін народ, але падзелены паміж сабой на нашчадкаў катаў і нашчадкаў ахвяраў. Так, бацькоў не выбіраюць і мы не можам змяніць гісторыю мінулую, але можам змяніць гісторыю будучыю. Мы не зможам з дзяцей катаў ці ахвяраў, стаць дзяцьмі праведнікаў, але мы можам зрабіць так, каб нашыя дзеці, не былі дзяцьмі катаў і ахвяраў але дзяцьмі праведнікаў. І гэта залежыць ад нас. Невывучаны ўрок гісторыі з ХХ ст.: рэпрэсіі, закрытыя архівы і адсутнасць пакаяння, не даюць нам магчымасці вырвацца з замкнёнага кола. І так, пасля выбараў атрымалася трагедыя пад назвай “Акрэсціна”. Дзе проста забівалі чалавека…. Яго білі… білі… білі…. Проста за нізашто. А чалавека біў іншы чалавек, якога і чалавекам назваць цяжка. Ён выхаваны ў ідэалогіі хлусні: БРСМ, Белая Русь – гэта ўсё хлусня. Ён штодня бачыў помнікі катам, імёны катаў гучалі ў яго вушах. Ён хадзіў па вуліцах названых у гонар катаў і ўрэшце ён сам стаў катам… Калі хочам, каб не паўтаралася трагедыя Акрэсціна, трэба разлічыцца з Курапатамі. Трэба прыбраць помнікі катам з вуліц і плошчаў нашых вёсак і гарадоў. Мы не зменім гісторыі; мы можам толькі яе пазнаць, прызнаць і пакаяцца і паяднацца паміж сабой. Дзеці ж не адказваюць за віну бацькоў. Беларусь сёньня стаіць на раздарожжы. (пра 2 магчымыя варыянты развіцця падзей, глядзі тут🔥 https://youtu.be/MKl0TDpaVDM 🔥) І ад нас залежыць, якім шляхам пойдзе. Змоўчым, праглынём сёння ў мірны час ахвяры і забойства сілавікамі 5 чалавек, здзек і катаваньне тысячы людзей - нас паглыне зло. Трагедыя “Акрэсціна" стала магчымай, бо мы праглынулі знішчэнне ўладай Курапацкіх крыжоў, хоць ужо тады, як казаў Лукашэнка, “Свёнтэк вазбухаў", але на жаль ён не пачуў яго. І Лукашэнка прапаноўваў напрыканцы мінулага года паставіць помнік Сталіну – кату. Гэта з яго згоды і па яго загадам адбываліся “Курапаты”. Пазастаецца толькі здагадвацца, хто насамрэч сёння аддае загад на катаванні беларусаў… Ланцуг пакаяння “Акрэсціна - Курапаты" гэта адзіны магчымы варыянт вырвацца з замкнёнага кола зла і насілля. Сябры, мінулая гісторыя не залежыць ад нас; але ад кожнага з нас залежыць тое што будзе заўтра.Станавіцеся ў ланцуг пакаяння. Яднайцеся з дзяцьмі катаў і ахвяраў ды разрывайце сувязь са злом, нянавісцю, беззаконнем і хлуснёй. І дапаможа нам Бог – наш нябесны Айцец. Айцец усіх нас.Няхай нашыя нашчадкі стануць пакаленнем, якія будуць казаць: “мы дзеці бацькоў - праведнікаў, бо яны пакаяліся”. ( памятай Армагедон працягваецца✌ https://youtu.be/w5u3sCS28Gc✌)