Ўжо адыходзячы 2020 год надоўга запішыцца ў памяці нашага народу. Кожны з нас па-свойму яго  ўзгадае ў сённяшнюю навагоднюю ноч. Аднак, усе мы зазначым перажытае выпрабаванне якім стала пандэмія каронавіруса. Хвароба ўстрэсла ўсім светам і Беларусь не стала выключэннем. Вірус рэальны, а не той што ў галовах, забраў жыцці шмат каго з нашых блізкіх і родных. І няхай Госпад прыме іх у сваё Валадарства вечнага жыцця. З іншага боку, пандэмія стала імпульсам да абуджэння нашага народу, што прывяло да сацыяльна-палітычных пераменаў ў Беларусі. Сябры, у 2020 мы бачылі беспрэцэндэнтнае праяўленне ў нашым грамадстве хлусні і насілля, але ж мы сталіся таксама сведкамі таго, як пад крык збіваемага  грамадства, нараджаўся новы беларус! Гісторыя біблійная вучыць, што калі нараджаецца новае жыццё, заўсёды знаходзіцца нейкі Ірад, які будзе імкнуцца праз тыранію, рэпрэсіі і  забойствы забіць нованароджанага. Але Бог мацнейшы Ірадаў. Будучы Ірадам, ці служачы яму, чалавек можа пераўтварыцца ў звера. Звер імкнецца забіць надзею ў сэрцах тых, хто паверыў у праўду і справядлівасць. Затрыманні, штрафы, арышты, турмы – гэта ўсё элементы запалохвання чалавека. Але чалавек не для таго прыходзіць у свет, каб жыць у страху ды хадзіць з апушчанай галавой,  але каб жыць з Богам. Не магчыма забіць надзею паверыўшага чалавека. Хрыстос тым, хто рыхтуецца на спатканне з Ім кажа: “выпрастайцеся і падыміце галовы вашыя” (Лк 21,26). 2020 год быў тым часам, калі мы выпрасталіся і паднялі галовы нашыя. Увесь свет пабачыў, што  нованароджаны беларус салідарны, смелы, мудры і міралюбівы. Беларус- гэта той, хто адчувае сваю годнасць і заўсёды пазастаецца чалавекам. Мы, розныя, з’ядналіся ў адзіным маршы да свабоды. Мы, неверагодныя, бо абралі шлях пераменаў і паверылі ў Новую Беларусь, у якой будуць жыць нованароджаныя беларусы. Праваслаўныя і каталікі, пратэстанты і грэка-каталікі, разам з вызнаўцамі іншых рэлігій ды з кожным чалавекам добрай волі. Мы ўсе згуртаваліся ў супольнай барацьбе са злом. І зло перамагаем дабром! Зло - часовае, дабро – вечнае. Зычу ўсім нам у новым 2021 годзе жыць у Новай Беларусі. Няхай споўніцца тая мара, якую нават не трэба агучваць, і якая ёсць у сэрцы кожнага з нас. І няхай здзяйсняюцца ўсе нашыя мары. Няхай Бог дазволіць нам захоўваць светлую памяць пра загінуўшых герояў Беларусі. Няхай урэшце ў нашай краіне запануе закон. На волю выйдуць усе палітвязні а адкажуць за злачынствы ды пасмакуюць баланду, тыя хто даўно ўжо забыўся, як смакуе выкананне закону. (https://youtu.be/-OrHrKTfv2s👍🔥 Прабачэнне - першы крок на шляху да больш справядлівага грамадства.) Няхай сам Хрыстос, які стаў чалавекам, дасць нам веру не толькі ў тое, што Бог стаў чалавекам, але і ў тое, што і чалавек можа быць чалавекам, а стаўшы зверам, можа ізноў стаць чалавекам. (цісні https://youtu.be/Gg393k7alAs Зорка ўжо заззяла святлом! Са святам Божага Нараджэння! З Калядамі.👍⚪❤⚪) Няхай жа Бог дасць нам веру. Як будзе вера, то і зможам ды пераможам. Зычу, каб той хто чакае, дачакаўся. А таму падыміце галовы вашыя. Мы ўваходзім у новы год, а у ім чакае ўсіх нас новая Беларусь. “Няхай благаслаўляе цябе Госпад і аберагае цябе! Няхай Госпад распраменіць сваё аблічча над табою і адорыць цябе ласкай. Няхай Госпад скіруе на цябе свой погляд і адорыць цябе мірам.” (Ліч 6,23-26). З Новым годам! З намі праўда і Бог. Жыве Беларусь.