Спыніце насілле – гэтыя словы, як рэфрэн, сёння гучаць з вуснаў мільёнаў беларусаў. У Беларусі працягваецца #Армагедон - бітва дабра са злом. На мінулым тыдні мы ўбачылі, што шмат хто гэту бітву прагуляў, чалавек пераўтварыўся ў звера. Гэта невыпадкова… Апрача той бітвы, якая мае зямное вымярэнне, ёсць яшчэ бітва і ў духоўным вымярэнні, па-за межамі часовага свету. Сатана змагаецца за душы беларусаў. І мы - беларусы самі выпусцілі гэтых дэманаў у наш свет. Адбылося гэта ў той момант, які упісаны ў нашую памяць, вельмі яркай і драматычнай падзеяй. Гэта - крыжалом у Курапатах напярэдадні свята Пасхі ў 2019 г. Крыж – сімвал праўды і любві, быў зневажаны, а мы прамаўчалі. Тады быў спрафанаваны не толькі крыж – сімвал хрысціянства, але яшчэ раз высмеяная гістарычная праўда. І праяўлена нежаданне каяцца за злачынствы – несправядліва пралітай крыві мільёнаў беларусаў. Чарговы раз мы развязалі зняволеных дэманаў і выказалі сваю згоду на іх дзейнасць у нашым жыцці , калі Лукашэнка прамаўляў на напярэдадні выбараў перад народным сабраннем. Ён прызнаваўся ў здзейсненых незаконна забойствах у 90-ые, а 2500 прысутных пляскаючы ў далоні 140 секунд, сваімі паводзінамі маўкліва апраўдалі зло, бо ніхто з іх не тое, каб запратэставаў, але нават не падняўся да ўзроўня Пілата, і ў знак сваёй незгоды, не выйшаў з шэрагаў і не вымаў сваіх рук. У выніку ў мінулым тыдні адбылося тое, што адбылося. Але гэта не канец. Супрацьстаянне дабра і зла не завершыцца аж да таго моманту, пакуль дабро не пераможа зло. Хтосьці скажа, а пры чым тут #Курапаты? Гэта ж мінулая гісторыя, трэба жыць сённяшнім днём і вырашаць бягучыя праблемы. Справа ў тым, што свет так створаны, што гісторыя ўвесь час паўтараецца. Невырашаныя праблемы з мінулага, ў яшчэ большым маштабе сустракаюць нас у будучым. Адсутнасць пакаяння за Курапаты, як і не разлічэнне грамадства са злом камуністычнага рэжыму, зрабіла магчымым, што сёння былі здзейсненыя злачынствы супраць мірных і не ў чым не вінаватых грамадзян. Гэтае злачынства зрабіла ўлада. У ім вінаваты і асабіста Лукашэнка, у ім вінаваты першыя асобы краіны, у ім вінаватае і Нацыянальнае Сабранне, але ў ім вінаваты і кожны з нас, хто пакрываў злачынствы ў Курапатах і не хацеў чуць і ведаць пра балючую праўду. Мы, цягам апошніх 26 гадоў, будавалі царства хлусні. Хлусня – нарадзіла нянавісць і насілле. Святы Ян Павел ІІ некалі навучаў: “Насілле- гэта хлусня, паколькі супярэчыць праўдзе нашай веры, праўдзе нашай чалавечнасці. Насілле знішчае тое, што трэба бараніць: “чалавечую годнасць, жыццё свабоду”” (КСВК 496) У выніку насілля з’явіліся забітыя, пакалечаныя, прыніжаныя, зняволеныя. На целе нашага народа, ўтварылася такая рана , якая будзе гаіцца яшчэ вельмі доўга. … Сёння маем толькі два варыянты развіцця падзей. Першая магчымасць-гэта мірным шляхам, праз праўду і любоў, зменім нашую краіну. Асудзім зло. Неадкладна выпусцім ўсіх затрыманых па палітычных матывах. Без ненавісьці, але згодна з прававымі нормамі пакараем тых, чые рукі ў крыві. Прызнаемся да найвялікшай хлусні, здзейсненай за апошнія чвэрць стагоддзя- фальсіфікацыі выбараў. Менавіта такая стратэгія адпавядае Божаму наказу з кнігі прарока Ісаі: «Захоўвайце правасуддзе і чыніце справядлівасць”. (Іс 56,1) Другі варыянт. Пойдзем на кампраміс са злом. І тады ўбачым, як гэта хітрая сістэма аўтарытарнага рэжыму, разгойдае хвалю дагэтуль не чувана вялікіх рэпрэсій супраць усіх тых, хто сёння ідучы за сваім сумленнем імкнецца атрымаць свабоду і знайсці праўду. Пры такім варыянце я буду адным з першых, каго вывезуць у Курапаты. І там вырастуць яшчэ мільёны новых магіл, дзе будуць спачываць тыя, хто палюбіў праўду і справядлівасць. Бо, як казаў мітрапаліт Тадэўш Кандрусевіч у звароце да Лукашэнка, «д’ябал — чалавеказабойца, ілгун і бацька хлусні” (пар. Ян 8, 44). І ён зробіць сваю справу, калі мы сёння праявім пасіўнасць і не пойдзем да канца ў супрацьстаянні дабра і зла. Я за першы варыянт. Сёння маліўся і казаў: “ Змілуйся нада мною, Госпадзе, Сыне Давіда! Мая краіна цяжка апантаная злым духам.” (пар. Мц 15, 21-28). Маліўся за ўсю нашу краіну, так як прасілі аб гэтым біскупы Касцёла. Я пайду таксама на марш свабоды. Гэта не палітычны выбар. Гэта мая пазіцыя, як чалавека. Я выбіраю праўду і свабоду. Я супраць хлусні і насілля. І хачу быць усюды там, дзе ёсць народ.