Памазаныя любоўю. Вялікі Чацвер. Пачатак Пасхальнага Трыдуума. Тры дні святкуем адну і тую ж тайну нашай веры. Тайну Божай любові да чалавека. Тры дні разам з Госпадам ідзём дарогай вызвалення… Пачаткам Трыдуума ёсць чацвер, дзень калі юдэі святкавалі Пасху. Паводле загаду Божага, гэты дзень быў на ўспамін аб вызваленні з егіпецкага рабства, дзень прадназначаны на святкаванне. Менавіта так напісана ў кнізе Зыходу 14, 12. Верныя наказам Закону юдэяў, Хрыстос з вучнямі, таксама спажываў пасху - ягнёнка. Так, як некалі ўпершыню рабілі гэта праайцы ў апошнюю ноч прабывання ў няволі.  Выхад з няволі пачаўся ў той дзень, калі анёл смерці праходзіў праз Егіпет і забіваў кожнае першароднае жыццё. Ад яго кары ўратаваліся толькі ізраільцяне, бо мазалі дзверы сваіх дамоў крывёю пасхальнага ягняці. Той, хто быў памазаны, той ратаваўся. Ратавала не кроў, але сам Гасподзь. Ён і выводзіў народ з няволі.  У чацвер, у дзень перад сваёй смерцю, Хрыстос, калі спажываў пасху з Апосталамі, старазапаветнаму сімвалу вызвалення надаў новы сэнс. Збаўца пазначыў сваіх вучняў новым знакам ратавання. Ён памазаў іх не крывёй ягняці але Божай любоўю.  Кожнае дзеянне і рух на святой вячэры сваёй сімвалічнасцю сягае вытокаў любові. Абрад абмывання ног, пра які піша Евангеліста Ян 3, 1-15, раскрывае сутнасць сапраўднай любві. Хрыстос любіць чалавека і Ён прыйшоў служыць чалавеку, а не каб яму служыў чалавек. Таму Ён і абмывае ногі сваім вучням. Пасля, таінства Эўхарыстыі. Хрыстос любіць чалавека, а таму назаўжды пазастаецца ў гэтым свеце з чалавекам і робіць гэта дзякуючы Эўхарыстыі. У Вялікі чацвер яшчэ не адбылося вызвалення чалавека з пад улады граху, хоць і былі ўстаноўленыя ўжо таінствы Эўхарыстыі і святарства, але завяршэнне збаўлення і перамога яшчэ наперадзе. Аднак, у гэты вечар Хрыстом было пазначана, што калі у Вялікую пятніцу сатана будзе паказваць сваю моц беззаконня на судах, а смерць будзе збіраць свой ураджай - вучні Хрыстовыя не загінуць. Так і сёння прадвызначана: той, хто памазаны любоўю Божай ніколі не загіне. Анёл смерці не мае над ім улады. Пазначанаму любоўю Бога наканавана асягнуць шчаслівае жыццё. Той, хто стаіць на баку Бога, любві, праўды і справядлівасці, можа быць абсалютна спакойным, бо яго лёс - вызваленне. А святкаванне перамогі дабра, Божай перамогі - непазбежнасць. глядзі таксама 🤚🤚💢 https://youtu.be/Tq2N4FrAVDU💢 Пасха пачынаецца ў чацвер. 💢 #Вялікі_чацвер #Пасха #Эўхарыстыя #проповедь #Касцёл #Беларусь #ксёндз