"Думкі нашыя памылковыя…" (Мудр 9,14) Кожны чалавек робіць памылкі. Пантыфік таксама можа памыліцца. Вось Папа Францішак і зрабіў яўную памылку, калі 24га жніўня загінуўшую Дар’ю Дугіну, вядомую таксама пад журналісцкім псеўданімам як Платонава, назваў няшчаснай дзяўчынай, а далей з тэксту вынікае, што яна залічваецца Пантыфікам да нявіннай ахвяры вайны. Дакладна словы Святога Айца гучалі так: "...вайна – гэта вар’яцтва. І ніхто з тых, хто вядзе вайну, не можа сказаць: “Я не вар’ят”. Вар’яцтва вайны. Я думаю пра няшчасную дзяўчыну, якая была забіта ў Маскве бомбай, закладзенай пад сядзеннем аўтамабіля. За вайну плацяць нявінныя! Давайце задумаемся над гэтай рэчаіснасцю і скажам адзін аднаму: вайна – гэта вар’яцтва. А тыя, хто зарабляе на вайне і гандлі зброяй – гэта злачынцы, якія забіваюць чалавецтва”. У чым памылка Пантыфіка? Нельга прафесійных прапагандыстаў называць нявіннымі ахвярамі вайны. Дар’я Дугіна акурат такой была. Яна дочка філосафа Аляксандра Дугіна - аднаго з Пуцінскіх натхняльнікаў у будаванні фашызму ў Расіі і рэалізацыі імперскіх агрэсарскіх амбіцый па-за межамі сваёй краіны. Дугіна публічна падтрымлівала поўнамаштабнае ваеннае ўварванне Расіі ва Ўкраіну. Напачатку ўварвання яна пісала: "імперыя будзь". Вайна нараджаецца ў першую чаргу ў людзкіх галовах і толькі потым чалавек бярэ ў рукі зброю і ідзе забіваць. Адпаведна большую віну і адказнасць за вайну маюць тыя, хто выбудоўвае яе ідэалогію. Дугіна адна з тых, хто нарадзіла вайну ў сваіх думках. Яна нават больш вінаватая, чым азвярэўшыя салдаты-бураты ў Бучы. Зрэшты, яна апраўдвала трагедыю ў Бучы і забойства вайскоўцамі гараджанаў назвала "інсцэніроўкай з трупамі людзей, якія выдаюцца за ахвяр расейскай агрэсіі». Не было б філосафаў Дугіных, не было б і прапагандыстаў Скабеевых і Сіманьян, Кісялёвых і Салаўёвых. Не было б гэтых прапагандыстаў - не было б азвярэўшых буратаў, і ніякай вайны таксама не было б. Так вось, назваць філосафа і палітолага, журналістку і прапагандзістку Крамля "няшчаснай дзяўчынай" падаецца не зусім карэктна. Хоць канешне кожны агрэсар ў глыбіні душы няшчасны і нікчэмны чалавек. А вось пад-час вайны сказаць у кантэксце гібелі адной з сааўтарак той самай агрэсіўнай вайны, што "за вайну плацяць нявінныя", гэта ўжо, безумоўна, не тое што некарэктна выказацца, але зрабіць яўную памылку. Загінуўшая Дугіна канешне была вінаватая. Так, яна не дачакалася суда, на якім пасля перамогі Ўкраіны ў ролі вайсковых злачынцаў будуць усе сённяшнія прапагандысты, але гэта не значыць, што мы можам яе з-за гэтага апраўдаць. Разам з тым, нельга абвінавачваць папу Францішка ў тым, што ён апраўдвае злачынствы вайны, або саму вайну, якую называе "вар’яцтвам" і патрабуе спыніць гэта вар’яцтва. Аднак, само патрабаванне скіраванае аднолькава, як да агрэсара так і да таго хто абараняецца - гэта несправядлівае патрабаванне. Бо агрэсар, які ваюе, здзейсняе зло, а ахвяра, якая ваюе каб абараніцца - чыніць маральна годны ўчынак. Ніхто не мае права патрабаваць Украіну спыніць абарончую вайну ў такім сэнсе, што мае паддацца агрэсару. Украіна можа спыніць вайну толькі дарогай перамогі над агрэсарам. Да таго ж, абсалютна нельга апраўдваць агрэсію Расіі тым, што яе хацелі прынізіць, бо Ната наступае - гэта аргументацыя ілюзорная. А рэальныя факты такія. Расія, дзякуючы ідэалогіі рускага міра, прасоўвае імперскую ідэалогію. Гэта беспасрэдна і рабіла Дугіна, а ў імперскай ідэалогіі няма мейсца для незалежных Украіны і Беларусі. І вось пра гэта чамусьці Папа Францішак ніколі не кажа, тады, як рэальна, напрыклад у Беларусі, адбываецца этнацыд. Бо ў турму садзяць за беларускую мову. Наогул нельга выкарыстоўваць аднолькавы наратыў для супрацьлеглых бакоў ваеннага канфлікту. Пра гэта кажа КСВК п.500 тады як ўзгадвае словы ІІ Ватыканскага Сабору з Канстытуцыі Gaudium et spes “Нельга забываць, што “весці ўзброенныя дзеянні з мэтаю справядлівай абароны – гэта адно, а зусім іншае з жаданнем падняволіць іншыя нацыі.”” Хоць папа Францішак тут маўчыць, але Касцёл не маўчыць. Прыгадаю словы Святога Яна Паўла ІІ, якія знаходзім у КСВК п.506. "Спробы знішчыць цэлыя народы, этнічныя, рэлігійныя або моўныя групы з'яўляюцца злачынствам супраць Бога і чалавецтва, а выканаўцы гэтых злачынстваў павінны несці адказнасць перад правасуддзем". У выпадку тэракта з Дугінай не было правасуддзя, але гэта абсалютна нікому не дае права назваць яе нявіннай ахвярай вайны. Касцёл кампрамітуецца, калі маўчыць, але гэта не значыць, што іерархам дазволена казаць такія словы, якія падліваюць алею ў агонь. @Real_News_R.B