Паслясмак Дня Перамогі. Альбо перадсмяротныя танцы на чужых касцях. Кожны год 9 мая задумваюся над заканчэннем вялікай вайны ў Еўропе. І тады,  калі шмат хто адурманены словам "перамога" у беспамяцтве святкуе ды дэманструе ірвенне зноў паваяваць, а ў Расіі, напрыклад, і рэальна ваююць, я ўсё думаю, хто ж у той жахлівай вайне з сярэдзіны ХХ ст перамог?  Даходжу да высновы, пераможцай выйшла, як бы не гучала тое парадаксальна, у першую чаргу Германія. Не, ну канешне, 7 мая 1945 г была падпісана безумоўная капітуляцыя ўзброеных сілаў вермахта, і 8 мая саюзнікамі адбылося прызнанне паразы нацысцкай Германіі ў вайне. Але ж, дзякуючы капітуляцыі і пасля Нюрнбергскаму трыбуналу, Германія насамрэч атрымала ўнутранае  вызваленне краіны ад нацысцкай ідэалогіі і, маім меркаваннем, ці ж гэта не ёсць сапраўдная перамога?  А вось пра ўсходнюю частку Германіі такога не скажаш, бо ў ёй знявольванне грамадства адной ідэалогіяй - нацысцкай, змянілася на знявольванне ідэалогіяй камуністычнай. І пасля былі патрэбныя некалькі дзесяцігоддзяў, каб рунуў берлінскі мур і краіна аб’ядналася. Ва ўсялякім выпадку сёння Германія свабодная краіна ў якой абсалютна няма мейсца для фашызму і, тым больш, нацызму.  А што ж з Беларуссю, якая ваявала супраць трэцяга рэйху? Калі казаць пра Беларусь і перамогу, то падаецца, лепш за Васіля Быкава не скажаш: "здабыўшы перамогу, мы не здабылі свабоды. Але без свабоды, чаго вартая кожная бліскучая перамога кожнага грамадства?" З перамогай Беларусі ўзнікае вельмі шмат пытанняў. Некаторыя з іх я агучваў у ранейшых відэа на канале, зрэшты за адно з іх год таму я атрымаў пісьмовае папярэджанне з абласной пракуратуры. 💢 https://youtu.be/W8nEP1OwuRQ 💢 "І абярнулася пермога таго дня ў плач усяму народу" (2 Цар 19,2). Ніколі зноў.| #день_победы| #9_мая 💢 Напэўна ў маральным плане нельга трактаваць тое агалошанае папярэджанне сур’ёзна, бо ў пісьмовым выглядзе я яго так і не атрымаў. Але ж у кожным з тых відэа я падкрэсліваў думку, што праз цяперашнія ваенныя парады на фоне замкнёных ваенных архіваў, памяць пра жах вайны закатваецца ў асфальт. Перасцерагаў, што вось такія парады 9 мая ў Расіі і 3 ліпеня ў Мінску ўзрошчваюць культ вайны.  І вось ці не яны ў выніку прывялі нас да новай страшнай вайны? Бесспрэчна, тое добра, што Беларусь была вызвалена ад нацыстаў, і добра, што беларусы разам з іншымі гналі тых нямецкіх фашыстаў; але зусім не добра, што ўся Беларусь на доўгія дзесяцігоддзі апынулася пад уладай камуністаў, якія былі тымі ж самымі фашыстамі хоць з іншай афарбоўкай. Сёння ж вырысоўваецца такая паралель. Германія хоць капітулявала - свабодная, а Беларусь жа, хоць і была на баку пераможцаў, дагэтуль пакутуе. Бо рэжым, які ўсталяваўся ў краіне чвэрць стагоддзя таму на руінах камунізма, па-духу ёсць блізкі да сістэмы ўлады ў фашысцкай Германіі.  Так, сённяшні рэжым у Беларусі безумоўна не замежны - нямецкі, але ж ён і не беларускі. Культурна ён чужы для беларусаў. А больш горшае - ён і варожы да беларусаў.  Сёння рэжым загаварыў пра генацыд беларусаў з часоў апошняй вайны. Але ж робіць гэта не таму, што спрабуе абараніць беларусаў, але толькі таму, што імкнецца апраўдваць генацыд супраць Беларусі, які быў раней у Савецкім Саюзе і які праводзіцца цяпер, ды ў якім сам удзельнічае.  У выніку, святкаванне Дня Перамогі і нібы мірнага неба над галавой, адбываецца пры адсутнасці таго самага мірнага неба ды пад акупацыяй з боку Расіі. Пры гэтым, калі рэжым ваюе са сваім народам (бо ў краіне тысячы рэпрасаваных людзей) і дае маўклівую згоду весці вайну супраць Украіны з тэрыторыі Беларусі, ён дэманструе сваю поўную капітуляцыю. Рэжым выбраў не дыялог з грамадствам але вайну. А як казаў папа Францішак: “Вайна – гэта правал палітыкі і чалавецтва, ганебная капітуляцыя, горкая параза перад сіламі зла" (#FratelliTutti  261). Вось такі ён дзіўны паслясмак святкавання дня перамогі. Пафасна, але ў беспамяцтве і вельмі падобна на перадсмяротны танец на касцях. Стан ап’янелага святкавання непазбежна зменіцца працвяразеннем.  Яно прыйдзе, калі будзе трыбунал. А Ён будзе, так што карты далёка хаваць не трэба, прыдзецца яшчэ не раз паказваць адкуль рыхтавалася нападзенне. 💢 глядзі таксама 💢 https://youtu.be/8Rq9skLqBEw 💢 9 мая 2020 г. Пра парад і перамогу.| День победы.💢 #нетвойне @belsat_news