Нас судзяць за выказванне сваіх думак, за супольныя катанні на лыжах, за прагулкі па вуліцах пад парасонамі але без іх таксама судзяць. Судзяць за спевы ў панадворках нашых дамоў, за чытанне кніг у метро, за няправільныя фіранкі на вокнах і за адзенне няправільнага колеру судзяць. А часам судзяць толькі за тое, што мы ёсць. Нас судзяць і за малітву да Бога і накладаюць табу на неправільную малітву “Магутны Божа" ды не пускаюць яе ў эфір. Гэтай малітвы, так падаецца мне, сёння д’ябал баіцца найбольш. Судзяць за надпіс на асфальце аднаго толькі слова “жыве” і забіваюць за напісаныя два словы “я выхожу". Гэта Вам не сюжэт з кнігі Джорджа Оруэлла 1984, гэта  Беларусь, якую збудаваў кіруючы ў ёй рэжым і, ў нейкай меры, кожны з нас. .... На днях я ізноў атрымаў позву у СК.  І заўтра 22-га красавіка 2021г. я маю намер туды пайсці. Са слоў сьледчай, мяне азнаёмяць з вынікамі экспертызаў на экстрэмізм матэрыялаў з майго ютуб-канала і вынікам спаткання мае быць прынята рашэнне адносна заводжання крымінальнай справы. Нагадаю, гэта гісторыя пачалася 12 лістапада 2020 г. 👍Следчы Камітэт пакуль не ўбачыў экстрэмізму на ютуб-канале ксяндза.| #Священник экстремист?👍 глядзі пачатак 🔥https://youtu.be/FgxYdfMzbIw👍) Што я думаю пра ўсё гэта? Думаю, калі б Хрыстос жыў у наш час у Беларусі, Ён бы не ўцякаў у эміграцыю , не спыніўся б у прапаведванні Валадарства Божага, хоць і ведаў бы, што за абвяшчэнне навучання будзе абвінавачаны па палітычных матывах, бо інкрымінавалі б Яму захоп улады і прынясенне шкоды нацыянальным інтарэсам. Ісус, так як прадказваў зруйнаванне Іерусалімскай святыні, так бы ў Беларусі прадказваў развал усёй дзяржаўнай сыстэмы, якая будавалася больш чвэрці стагоддзя і якой вельмі ганарыцца правячы рэжым, але менавіта такое кіраванне ўсю краіну і давяло да небяспечнай рысы – пагрозы далейшага існавання. Бо дзяржава, што будуецца на беззаконні і хлусні, ніколі не можа мець трывалай будучыні. 🔥#Беларусь. Да перамогі адзін крок. | Стена рухнет| #Костёл. #проповедь. 🔥глядзі👍 відэа https://youtu.be/GnSMY21tbvM🔥🔥🔥 Хрыстос, вядома, не выказваў бы ніякіх палітычных лозунгаў, не казаў бы нават “я выходжу" і не пісаў бы на асфальце “жыве", але проста ішоў бы насустрач будучыні, насустрач гісторыі, бо няма найменшага сэнсу ўцякаць ад таго, што прадбачанна для цябе Божым провідам. А таму трэба проста без страху ў сэрцы ісці наперад і пазаставацца чалавекам.  Хто ж верыць у магчымасць жыцця ў духу праўды і справядлівасці, той і зможа асягнуць лепшы ўзровень, так, як некалі ў зямлю абяцаную увайшло тое пакаленне народу абранага Богам, якое навучылася жыць па-Божаму ЗАКОНУ, а не тое, што тужліва ўзгадвала жыццё ў рабстве. У гэтым і ёсць жыццё чалавека. Шкада, што сёння ў Беларусі створаныя такія ўмовы што, каб пазаставацца чалавекам трэба быць здольным пайсці амаль на крыж, але ж і Хрыстос пачуў словы ў свой адрас “ecce homo“ - вось чалавек, акурат тады калі Сын Божы ўжо канаў на крыжы, а сказаў іх рымскі жаўнер. Страшна не цярпенне і смерць, страшна ў зямных хістаннях згубіць сваю чалавечнасць. Страшна стаць прыстасаванцам. Пазастаньмася людзьмі. І давайце прасіць Бога, як заахвочваў папа Францішак у красавіку маліцца "...за людзей, якія рызыкуюць сваім жыццём, змагаючыся за асноўныя правы там, дзе пануюць дыктатуры і аўтарытарныя рэжымы, а таксама ў дэмакратычных краінах, якія перажываюць крызіс." З намі праўда і Бог.