Аб’яўленне Госпада. Ахвяраванне падарункаў трымя мудрацамі дзіцяці- Ісусу з’яўляецца сваеасаблівым вызнаннем веры. Падараванае золата - гэта сімвал веры ва ўсемагутную царскую ўладу Ісуса, кадзіла - у боскасць Ісуса, мірра - у людзкую натуру Ісуса. Адметна, што гэту веру вызнаюць прыналежныя да паганскіх народаў, а не сыны народу Ізраільскага,  паслядоўнікі монатэістычнай рэлігіі. Ахвяраванне падарункаў,  гэта таксама той момант, калі чалавек сустракаецца з Госпадам. Можам дыскутаваць, наколькі доўгі быў шлях мудрацоў, які прывёў іх да спаткання з Месіяй, але з упэўненасцю сцвярджаем, што гэта дарога была незваротнай. Бо вядома, евангеліст Мацвей сцвярджае, што мудрацы "іншай дарогай адышлі ў сваю краіну". (Мц 2,12) Магчыма гэтая цытата з Евангелля не павінна быць крыніцай вялікіх багаслоўскіх разважанняў, але гэта дробная акалічнасць, што падкрэслена словамі Бібліі, усё-ж ёсць увасабленнем глыбокага сімвалізму. Чалавек, які сустракаецца з Богам, непазбежна пачынае ісці іншай дарогай, чым хадзіў дагэтуль. Дарога мудрацоў больш не магла перакрыжоўвацца з дарогай Ірада - гэта значыць беззаконня, хлусні і тэрору. Падобна і хрысціянін з такім шляхам нічога супольнага не можа мець. Чалавек пасля сустрэчы з Ісусам ідзе "іншай дарогай", бо ён наогул пачынае ісці ў іншым кірунку. І калі гаворка ідзе пра вяртанне дадому, то вяртаецца ўжо не да сваёй краіны і бацькоўскага дому у якім нарадзіўся і вырас, але да дому Нябеснага Айца, ў краіну Божага Валадарства, для якой нарадзіўся, каб у ёй жыць вечна. "Іншая дарога", на якую становіцца чалавек пасля сустрэчы з Ісусам - гэта дарога заўсёды невядомая. Евангелле не падае аніякіх акалічнасцяў таго, як мудрацы вярнуліся да сваёй краіны. Бо навошта? Вядома, што "іншая дарога" у кожнага свая, яна індывідуальная і непаўторная. Няма чаго нават загадваць, што каго чакае на ёй. І ўсё-ж, яна хоць і невядомая, але бяспечная, бо на гэтай дарозе чалавек ніколі не будзе адзін. Госпад не пакідае тых, хто вызнаў у Яго веру, так, як тое зрабілі мудрацы. Урачыстасць Аб’яўленне Госпада прыадсланяе тайну збаўлення ўсяго чалавецтва. Бо, як піша Апостал Павел у Пасланні да Эфесцаў, "цяпер адкрылася, што язычнікі з’яўляюцца сунаследнікамі абяцання" (Эф 3,6). І гэта значыць, што "іншая дарога" у Божым плане прыдугледжана для кожнага з нас. А вось ці знойдзеш тую дарогу шчаслівага вяртання дадому, залежыць толькі ад таго, ці вызнаеш веру ў Ісуса, якую вызналі мудрацы.  Усё у тваіх руках. Нават калі рукі пустыя, нованароджанаму Ісусу ў ахвяру можаш скласці сваёй сэрца. Яму больш не трэба. Гэта і ёсць самае дасканалае вызнанне веры - наша здольнасць любіць. Глядзі відэа https://youtu.be/hoae7spQoCk #Naviband ад байкота рэлігіі да асабістай сувязі з Богам. Інтэрв'ю| #перемены