Серыя "Беларуская народная творчасць" Балады. Т. ІІ. Нумар 965 Зап. М. Федэроўскі каля Зэльвы Ваўкавыскага раёна "Паданневыя" Ой, у полі явар зеляненькі, Пад яварам - жаўнер маладзенькі. Пад яварам - жаўнер маладзенькі, Пад жаўнерам конь вараненькі. Сядзіць жаўнер, на скрыпаньцы грае, А струна струне жалю задавае. А там струна струне голас падавае, А там маці сваго сына да й так наўчае: - Ой, чаму, сынку, нагайкі не маеш? Ой, чаму, сынку, жонкі не караеш? - Ой, маці, маці, парадніца ў хаце, Парадзь жа мне, маці, як жонку караці. - Ой, вазьмі, сынку, драцяну нагайку Да карай жонку з вячора да ранку. Скора мілая волікі прыгнала, Не ўвайшла да хаты, пад акном стаяла. Ажно свякроўка вячэраньку варыць, Ажно свякратка дубінаньку парыць, А яе міленькі дзяціну калыша, Дзяціну калыша, дробны лісты піша. Ох, і з вячора камора звінела, А ўжо з поўначы і жонка няжыва. - Ой, маці, маці, парадніца ў хаце, Парадзь жа мне, маці, як жонку схаваці? - Запражы, сынку сівую кабылку Да завязі жонку ў чыстае поле: Думацімуць людзі, што пшаніцу поле. А ў нядзелю рана чуць соненька ўсходзіць, А ўжо мой міленькі па рыначку ходзіць, Па рыначку ходзіць, па рыначку ходзіць, Сівую кабылку за сабою водзіць. - Ой, ўстань, мая міла, бо дзяціна плача! - Ой, няхай плача і не перастае, Няхай тое знае, што маткі не мае. Чакайце новыя песні тры разы на тыдзень - панядзелак, серада і пятніца. Яшчэ больш песен у телеграм канале: https://t.me/spiavaizasynai