У 1110 г. у сямі князя Георгія Усяслававіча нарадзілася дзяўчынка. Бацькі далі ёй старажытнае імя Прадслава. «Па мячу» яна паходзіла з дынастыі Рурыкавічаў, а «па кудзелі» была нашчадзіцаю першага полацкага князя Рагвалода. Ейным дзедам быў знакаміты Усяслаў Чарадзей. Калі Прадславе споўнілася 12 гадоў, бацькі вырашылі аддаць яе замуж. Але дзяўчына абрала іншы жыццёвы шлях: насуперак волі бацькоў яна пастрыглася ў манашкі. У адпаведнасці з традыцыяй яна абрала новае імя, Еўфрасіння, і пачала шлях да святасці. Сёння Еўфрасіння лічыцца апякункаю Беларусі і першаю жанчынаю-святою на ўсходнеславянскіх абшарах.