Напісаная ў 2014 годзе песьня ў тым самым годзе была выстаўленая ў сеціва https://www.youtube.com/watch?v=9fv9yXoYMPo пад застаўку з партрэтам праваабаронцы Алеся Бяляцкага, які тады адбываў пакараньне паводле згарбузаванага ўладамі, а насамрэч палітычна матываванага, абвінавачаньня ў хаваньні прыбыткаў у асабліва буйным памеры. Песьня была актам салідарнасьці з Алесем і спробай патрымаць яго. Цяпер я перасьпяваў яе як напамін: не пакідаць сваіх, не пакідаць тых, хто змагаецца з рэжымам, а быць часткай змагарных кагортаў. Відэазапіс Славаміра Сокалава. НА БАРЫКАДЗЕ Растаяла рэха, разьвееўся дым, Кавалкі сьмецьця, кавалкі плоці. І сонца ў небе шматком рудым, Ня ў золаце... Нават не ў пазалоце. Бярэ кашчавая свой разьбег, Прыціхла зямля ў смуродным чадзе, І цяжка сказаць хто загінуў хто зьбег – Але ты адзін на барыкадзе. І цяжка сказаць хто загінуў хто зьбег – Ты раптам адзін тут на барыкадзе. Ня чуць, ня бачыць – было б лягчэй. Як асьцярожна – дык менш трывожна. Ды трэба трымаць вастрыню вачэй І чуйны слых, бо іначай ня можна Вось так вось выстаяць аднаму Насупар здрадзе і кананадзе, Бо больш стаяць тут няма каму – Нікога побач на барыкадзе. Бо больш стаяць тут няма каму – Ніхто не стаіць больш на барыкадзе. А хтось шапоча табе з начы: “Трымайся цьвёрда на полі бою...” “Мы абяцаем дапамагчы...” “Ты будзь сабой... мы ж заўсёды з табою.” “Мы побач, блізка, мы ў абыход, Або зьнянацку, бо мы ў засадзе!” “Бо мы з табою, мы твой народ, Хоць ты і адзін там на барыкадзе!” “Бо мы з табою, мы твой народ, Хоць ты й бяз нас там на барыкадзе”. А можа гэта шапочуць мне Зь нябыту продкі, што па-за працай Жылі, гулялі бо не ў цане За незалежнасьць было трымацца. Было б што есьці, было б што піць, Пры кожным ладзе й любой уладзе, А лёс не жартуе, ня сьпіць, ня кпіць – І вось ты адзін на барыкадзе. А лёс не жартуе, ня сьпіць, ня кпіць – Таму й адзін ты на барыкадзе. У гэтай песьні няма канца. У гэтым стане няма разьвязку. Дзе ўзяць для чэрствай душы сяўца, Зьмяніўшы месцамі яву й казку? Гляджу праз далеч, праз лёс і час І бачу на самым на даляглядзе... А мо й напраўду ўжо двое нас На нашай супольнай... на барыкадзе? А мо й напраўду ўжо двое нас... Ды тут адзін я на барыкадзе. 14 красавіка 2014 г. Бярнардаў гасьцінец.