ІЗНОЎ НЯМІГА Менск. Няміга. 14 ліпеня 2020 году. Першая сёлетняя фізычная сутычка з уладамі нагадала пра помнік нашай літаратуры 12 стагодздзя “Слова пра паход Ігараў”. “На Немизѣ снопы стелютъ головами, молотятъ чепи харалужными, на тоцѣ животъ кладутъ, вѣютъ душу отъ тѣла”. Ізноў славутая Няміга – Як захавальніца традыцый. З часоў мінулых, махам-мігам, Жыцьцё зьвялося да міліцый, Жыцьцё зьвялося да амонаў, Да чорнай і нялюдзкай зграі, Але трываньне – не бяздона, І еднасьць ворагаў карае. Ну, вось і новыя героі Пад нашым вечна мірным небам – Адзін за ўсіх, а ўсе гарою За аднаго, ну, як і трэба. І тут ня фішка быць крутымі. Круты хто здуру, сп'яну б'ецца. Я ў захапленьні вамі, тымі, Хто не ў ярме, хто не здаецца, Хто не з паслужлівых баранаў, Хто не з падлізаў да пачвары, Хто не дае беспакарана Хапаць, круціць, пляваць у твары. Няхай крычаць прапагандоны Ману, ва ўгоду важным фігам, Іх толькі жменька, нас – мільёны. Ізноў Няміга! 14 ліпеня 2020 году. Бярнардаў гасьцінец.