В АДНОМ В МЕСЬЦЕ Сапраўды? Незарэгістраваны кандыдат у прэзыдэнты Беларусі Віктар Бабарыка й ачольніца ягонага штабу Марыя Калесьнікава ствараюць сваю партыю? Не падумайце нічога кепскага. Партыі ў нас ствараюць усе хто знайшоў пустую партыйную нішу ў палітычнай палітры краіны. Таму тут нічога новага. Зрэшты, нічога новага няма й у праграме новай партыі. Канстытуцыйная рэформа, паляпшэньне эканомікі, выхад з крызісу, вяртаньне вольнасьцяў. Таму, з гэтага гледзішча, лягчэй было не вынаходзіць ровар, а далучыцца да якой заўгодна іншай, ужо наяўнай Беларускай партыі, якая мае досьвід у палітыцы й барацьбе, мае гісторыю й мае пэўную колькасьць адданых, гатовых працаваць на голым энтузіязме, чальцоў. Ну, я разумею, амбіцыі. Дырэктар “Белгазпрамбанку” і раптам шараговы сябра партыі. Партыі ў якой яшчэ трэба даводзіць сваю вартасьць, здабываць аўтарытэт, ствараць вакол сябе кола прыхільнікаў. А часу не стае. Часу проста няма. Відаць таму новыя палітыкі, каб хоць неяк адрозьніць сваю, новую, ад не сваіх, старых, Беларускіх партыяў, не змаглі прыдумаць нічога лепшага як назваць гэтую новую чужамоўным словам. Партыя на Беларускамоўных абшарах, а назва не. Магчыма нешта падобнае недзе ёсьць. Бескультур’е – зьява ня новая. Але навошта яго дэманстраваць усяму сьвету? Асабліва цяпер, калі той чарговы раз пераконваецца ў вышэйшых культурных і маральных якасьцях нашага народа. Ну, сабралі б сабе гурток, ці, нават, клюб... па інтарэсах... Напрыклад клюб аматараў расейскай мовы, а лепш рускага брата, а яшчэ лепш рускага міру. Ну й назвалі б яго “Вместе”. Але каб партыю “Вместе”. Я ведаю “шыла в адном месьце”. Але яно не партыя й ягонае другое дно ў торбе не схаваеш. ваша партыя што сапраўды называецца вместе я хачу адгукнуцца на вместе пытаньнем в каком бо і віця і маша набраліся пошласьцяў дзесьці і цяпер валакуць іх у нашу рэальнасьць крадком сьвет ня зблутаны сном за вакном бачу вмесьце, дзе й шыла, в адном 1 верасьня 2020 г. Бярнардаў гасьцінец.