ЧЫЯ СМАЛЕНШЧЫНА? Чый Крым? Нават самых прамаскоўскіх Беларусаў жыцьцё навучыла адказу. Нават самых нязгодных, самых зацятых сракалізаў, калі яны хацелі застацца ў Беларускім палітычным полі як нацыянальныя дзеячы, жыцьцё навучыла, ну, ці прымусіла. Сёньня гэтае пытаньне ўжо не лакмусавая паперка, а паперка для падціркі, таму што самога пытаньня не йснуе. Крым – гэта Ўкраіна, Крым – гэта татары. І вось цяпер, калі Масква ўпарта крочыць да свайго чароговага, будзем спадзявацца апошняга, брутальнага папялішча, калі Японія ізноў загаварыла пра адцятыя ў яе Курылы, а Польшча пра гістарычную справядлівасьць у выглядзе вяртаньня ёй Каралеўца, мы абавязаныя напоўніцу заявіць пра нашыя правы на акупаваную Масквой Смаленшчыну й дзе-якія раёны Пскоўшчыны. І тут ня трэба ніякіх доказаў, ніякіх рэфэрэндумаў, хаця доказы ёсьць і іх больш, чым дастаткова. Проста адукацыйны складнік гэтага пытаньня крыху адстае ад палітычнага, але палітыкі павінны ведаць і прадбачыць. На тое яны й палітыкі. Ну а я падмацую ўсё гэта песьняй у якой памылковы расейскі тэкст быў папраўлены слушным, Беларускім. ТРЫ ТАНКІСТЫ Словы Барыса Ласкіна (Беларусія папраўкі Сержука Сокалава-Воюша). Музыка братоў Шмуля, Зьміцера й Данілы Покрасаў. На мяжы ўсё не па-сяброўску І нічога добрага няма, Ля высокіх берагоў дняпроўскіх Наша варта стала нездарма. Там стаіць магутны і трывалы Наш адважны баявы заслон, На выпадак з назваю: ці мала Бранявы ударны баталён. Там жывуць, і гэты сьпеў бясспрэчны, Непарушнай зладжанай сям’ёй Тры танкісты – тры сябры навечна, Экіпаж машыны баявой. На траву лягла раса густая, Спаў туман абложны і цяжкі. Не кітайцы і не самураі Да мяжы падлезьлі ля ракі. Данясла выведка без развагі І пайшоў супроць чужых калён Павяртаць Смаленскія абсягі Бранявы ударны баталён. Пёрлі танкі для варожай страты, Несьлі ў бой пагрозную браню, І ляцелі вобзем супараты Пад наструнам сталі і вагню. І дабілі, гэты хвакт бясспрэчны, Варагоў атакай агнявой Тры танкісты – тры сябры навечна, Экіпаж машыны баявой. Дык, чыя Смаленшчына, спадары Беларускія нацыянальныя палітыкі? Чыя? Доўга ня думайце, каб пазьней не давялося, як тым палонным маскаляма ва Ўкраіне, адказваць, што мы, маўляў, ня ведалі, нас падманулі, нам нічога не сказалі. Згатуйце кавы, зьешце кавалачак Напалявона й адкажыце. Цяпер самы час! Слава Ўкраіне! Жыве Беларусь! 31 сакавіка 2022.