ВЕРШ ЯК УСТУП Зноў выходзяць касінеры Ворагаў касіць. Прэч ябацькі, прэч блюзьнеры, Што сьмярдзець-русіць. Што іржаўку-мілітарку Кідаць супраць нас – Мы дзяржаўку у адстаўку, Час на дыбу вас. Як віруюць пеняць лёсы! Скачуць шал і яр! Дык, шчасьлівага ўкосу, Касінер-ваяр! 30 верасьня – 5 кастрычніка 2022 МАРЫСЬКА Крочу, крочу сьцяжынаю, еду, еду дарогаю Каму год каму два ці больш. Шлях нялёгкі, няблізкі... А наперадзе любая, любая, А наперадзе родная, родная, А наперадзе самая годная, Чарнабрэва Марыська. Я дакрочу, даеду я, што мне тыя адлегласьці, Агняпальныя строкаты і гарматныя бліскі, Як над Прыпяцяй любая, любая, Як над Прыпяцяй родная, родная, Як над Прыпяцяй самая годная, Чарнабрэва Марыська. Я панішчу кайданы ды шоры й кляпы варожыя – І адродзіцца вольніца, шугане палымніскам Ты са мной мая любая, любая, Ты са мной мая родная, родная, Ты са мной мая самая годная, Чарнабрэва Марыська. Мы зарокам зьвязаныя, мы жыцьцём заручоныя, Наш супол пабрацімскі тут, наш сусьвет таварыскі... Там за Прыпяцяй любая, любая, Там за Прыпяцяй родная, родная, Там за Прыпяцяй самая годная, Чарнабрэва Марыська. Я цябе на руках сваіх уздыму вышай сонейка, На калена ля ног тваіх стану годна і нізка... Я з табой, мая любая, любая, Я з табой, мая родная, родная, Я з табой, мая самая годная, Чарнабрэва Марыська. 12 верасьня 2022 г.