ПРЭЧ БАЯВОЕ ШАРАЕБСТВА* Мясьціны славы нашай зброі – Адвага, талент, крышку цуд... Тут нараджаюцца героі, Хаця й жывуць, парой, ня тут. Вось так, ад Воршы ўзяўшы сьцежку, На Крапіўніччыне знайшоў Сябе, сям’ю, ды лёс-мярэжка Злавіў, і здатна зладзіў шоў. Бо як толькі кацапы Накіпцюрылі лапы, Хто ты, што ты і зь кім Выпаў час вызначацца. Ён у згодзе з сабой Рэк, ідучы на бой Разам торам цяжкім: – Я ж прыйшоў ваяваць, а не спрачацца. Яна такая, наша доля, І наша соль, і наш гэном – Мы прагна цягнемся да волі, Ды верым тым, хто за стырном. Але прыходзіць час і ў верах Растуць зьняверы цераз боль. Пакіньце спрэчкі! Збройны шэраг – Адзіны шлях змагчы юдоль. Хвацка зладзілі ловы, Затлумілі галовы, Але ў цемры прасьвет Пачынае згушчацца: Я сыйшоў ад хлусьні, Ад пустой балбатні, Вось вам мой запавет: – Я прыйшоў ваяваць, а не спрачацца. 11 лютага 2023 г. * Напэўна, тут, я магу памыляцца, я ўпершыню пачуў ад “Папіка” паняцьце “баявое шараебства”. “Баявое шараебства” – гэта такая жартоўная назва ўсяго таго часу, калі ты не задзейнічаны ў нарадах, трэніроўках, вывучэньні зброі, на палігоне і іншым. Сюды адносіцца і сон пасьля начнога нараду”. Крын. Кусь. “Папік” 18.07.2022. https://war.by1.info/2022/07/18/papik/.