9 лістапада ў Міжнародным доме маракоў на Манхэтане адбылася прэзэнтацыя чарговага, 7 па ліку, літаратурнага штогадовага выданьня беларускіх пісьменьнікаў замежжа - альманаха "Беларус". Прэзэнтацыя адбылася пад час сходу БАЗ "Пагоня", вёў імпрэзу адзін з аўтараў выданьня, празаік і выкладчык Віталь Воранаў. Удзел таксама бралі: выдавец і галоўны рэдактар Марат Клакоцкі, старшыня БАЗ "Пагоня" і сталы аўтар альманаха Віталь Зайка, вядомы бард, паэт і перакладчык Сяржук Сокалаў-Воюш, свой верш "Жыцьцё" прачытала маладая аўтарка Тацяна Саланко. Апладысмэнтамі віталі прысутныя старэйшыну беларускай дыяспары ў Амэрыцы 98- гадовага Антона Шукелойця, які распавёў гісторыю ранейшых беларускіх эмігранцкіх выданьняў. У альманаху "Беларус" друкуюцца літаратурныя творы як прафэсіяналаў, так і аматараў. А набыць яго можна, наведаўшы старонку у інтэрнэце: www.e-krama.com