У Нью-Джэрсі сумесна адсвяткавалі 100-я ўгодкі БНР бруклінскі і ньюджэрсійскі аддзелы Беларуска-Амерыканскага Задзіночання і БАЗ "Пагоня". 25 сакавіка, а 10-й раніцы, пачалося набажэнства з малітвай за Беларусь у царкве Святое Жыровіцкае іконы Божай Маці ў Гайленд-парку, пасля чаго госці накіраваліся ў рэстаран гатэлю Hyatt у Нью-Брансуіку, дзе адбыўся урачысты сход са святочным абедам і канцэрт. З віншавальнымі прамовамі выступілі ганаровыя госці: першы амбасадар ЗША ў Беларусі Дэвід Суорц і Джон Кунстадтар - былы намеснік амерыканскай амбасады ў Беларусі. Асабліва цёпла была сустрэта публікай прамова Джона Кунстадтара, бо ён прамаўляў па-беларуску. Далей выступілі кіраўнікі ньюджэрсійскага аддзела БАЗА Юрка Азарка і БАЗ "Пагоня" Віталь Зайка. Прамова Зянона Пазьняка была прысвечаная значэнню стварэння БНР для набыцця незалежнасці Беларусі. Была прынята сумесная рэзалюцыя. Ва ўрачыстай імпрэзе ўзялі удзел таксама госці з Беларусі: Юры Беленькі, намеснік старшыні КХП-БНФ, грамадскі дзеяч з Ліды Валеры Мінец і мастак Іван Мікулка, які падарыў амерыканскім беларусам герб "Пагоня", выразаны з дубу. У святочным канцэрце прымалі ўдзел бард Сяржук Сокалаў-Воюш і сям'я музыкаў Пархоменка-Казакоў.