📜Гадавік распачынаецца артыкулам пра раней невядомыя беларускамоўныя тэксты, якія ствараліся ў атачэнні Кастуся Каліноўскага. Дакументы г. зв. Бернардзінскай калекцыі дазваляюць паглыбіцца ў праблему “Каліноўскі і беларуская нацыянальная ідэя” і адкрываюць новыя старонкі ў гісторыі паўстання 1863 г. Насамрэч яно было вайной, цэнтральным элементам якой стала паняцце СВАБОДЫ. Даследчыкам варта яшчэ раз задумацца над пытаннем, за якую свабоду змагаліся паўстанцы? Сацыяльнае ці нацыянальнае было яе сэнсам? Іншы бок гэтай праблемы – тая несвабода, якую прынесла на штыках Расійская імперыя. Якія сляды яна пакінула ў нашай гісторыі? І, канешне, заўсёднае “праклятае пытанне” пра кошт спробы вырвацца з-за кратаў заняволення.