Старшыня ЦВК Беларусі Лідзія Ярмошына заявіла, што ў Беларусі немагчымая перамога кандыдата "з інтэрнэту". Гэтае выказваньне, натуральна, зачапіла частку ўкраінскіх журналістаў. Больш таго, мне давялося камэнтаваць такую тэзу аднаму з тэлеканалаў. З аднаго боку пані Лідзія ў нечым мае рацыю - пакуль электаральная рэвалюцыя кшталту ўкраінскай (без моцнае зьнешняе падтрымкі) малаверагодная. Але, адначасова з тым, яна памыляецца ў галоўным, спрабуючы ацэньваць працэсы ў грамадзтве, зьмену самога стылю, спосабу атрыманьня інфармацыі, узяўшы за аснову досьвед мінулых гадоў. Ідзе зьмена пакаленьняў, прычым гаворка тут ня толькі пра ўзрост, але й пра карэнныя адрозьненьні ў рэакцыі на атрыманую інфармацыю. Працэс не мае межаў і, ён закранае цэлыя рэгіёны, не абмінае й Беларусі. Ягоныя магчымыя вынікі не нясуць нічога пазытыўнага ні Лукашэнку зь ягоным атачэньнем, ні значнай частцы "лідараў апазыцыі". Калі ёсьць запыт на зьмену элітаў, то стары палітык альбо спрабуе ачоліць працэсы (і, як вынік мяняецца сам), альбо сьпісваецца на звалку гісторыі. Можа ў якасьці "старонкі ў падручніку", а можа і як гістарычны пыл. Пра ўсё гэтае ўзяў на сабе сьмеласьць паразважаць у гэтым роліку. Тэмы, паднятыя ў відэа: 2:41 Чаму перамог Зяленскі і чаму такое разьвіцьцё падзеяў можна было прадкаць, прынамсі, з восені 2018 году. Хто ёсьць ядром "групы выбаршчыкаў" Зяленскага? Моладзь да 35, жыхары гарадоў, людзі што зрабілі сябе самі. Гаворка пра першы тур - сапраўдныя рэйтынгі, а не ператокі 2 туру. 4:14 Разьбіваем стэрэатыпы па нізкі адукацыйны ўзровень "Слугі Народу". Чаму колькасьць людзей з двума (!) дыплёмамі, колькасьць дактароў навук і кандыдатаў у фракцыі -пераможцы перавышае аналягічны паказчык большасьці канкурэнтаў. Чаму адукаваныя і мабільныя людзі пайшлі ў палітыку праз сяброўства "партыі з YouTube"? І чым гэты працэс падобны на тое, што спакваля йдзе ў Беларусі? 6:00 Крыху пра міф "у Зяленскага як кандыдата ў прэзыдэнты не было праграмы" і шмат пра тое, як камунікаваць з новай мэтавай аўдыторыяй. Людзі, якія прыходзяць на зьмену старыкам думаюць больш рацыянальна і яны не ўспрымаюць пафасную лухту, якая ліецца з тэлевізара. Новы стыль камунікацыі быў не зразумелым старым элітам і гэта выклікала страх ды нэрвовую рэакцыю. Што мы і назіралі. 8:44 Паралелі зь Беларусьсю. У нас ідуць аналягічныя працэсы. Возьмем прыклады сьвяткаваньня ўгодкаў БНР і канфлікт аргкамітэту "з інэрнэту" са старымі палітычнымі элітамі. Пра зьмены пакаленьняў можа гаварыць нават флэшмоб "раздеваемся і пашем". Гэта ўсё не зразумела "дасьведчаным лідарам". І гэтае выклікае страх, агрэсію і неўспрыманьне. Старыя апазыцыйныя партыі, на жаль, не зьвяртаюць увагі на зьмену структуры групы сваіх патэнцыйных прыхільнікаў. Праца ў схеме "барацьбы з рэжымам" не дазваляе зірнуць далей за "глёбус Беларусі" і пабачыць варункі, у якіх можа разьвівацца краіна. Крыху пра глабальныя сілы, ЕС, Кітай, ЗША і, натуральна, РФ. 14:43 Кадры. Лёгіка паводзінаў Лукашэнкі і лёгіка партыйнага будаўніцтва ў Беларусі. Улада робіць усё каб апазыцыйныя партыі не атрымалі прытоку новых людзей. З аднаго боку, палегчылі "кадравую барацьбу" лідарам апазыцыі, з другога зьнізілі агульны патэнцыял апазыцыйных партый. 16:12 Вяртаемся да Ярмошынай. Для яе, для Лукашэнкі і старых эліт (у тым ліку апазыцыйных) новыя сродкі камунікацыі - абсалютнае зло. Зьмена лёгікі паводзінаў небясьпечна для іх, бо патрабуе зьмены палітычнае камунікацыі, ў якой старыя мэтады, старыя тэзы, мэты, не маюць ніякага практычнага значэньня. 18:12 Лукашэнка (ці ягонае атачэньне) адчуваюць зьмены і спрабуюць падцягнуць здольных думаць апанэнтаў ці ў дарадчыя органы ці шляхам стварэньня ўмоваў для дзейнасьці ў пэўным кірунку. Астатніх спрабуюць зьвесьці у маргінэз. Тыповы прыклад - пастка з рэстарацыяй "Паедзем Паядзім", як, дарэчы і ўвесь кейс камбінацыі з Курапатамі 2017-19 гадоў. 20:40 Беларуская апазыцыя можа атрымаць перамогу. Але пры адной ўмове - цьвяроза ацэньваць свой патэнцыял, адкінуць "глёбус Беларусі" і спрабаваць аналізаваць працэсы ў Беларусі ды навокал. Гэтыя ідэі можна даносіць, балазе ёсьць дзясяткі мэтадаў выхаду да мэтавай аўдыторыі. Трэба проста пачаць думаць і рабіць. Хотите знать больше - ищите мою страничку в ФБ: https://www.facebook.com/Ihar.Tyshkevich