Да другога туру выбараў у Украіне застаецца не так багата часу. Прэзідэнт Беларусі Аляксандар Лукашэнка свайго часу некалькі разоў выказаў упэўненасьць у тым, што перамогу атрымае Пётр Парашэнка. Але днямі выказаўся і пра ягонага апанэнта Уладзіміра Зяленскага: заявіў, што і актор можа стаць эфэктыўным прэзыдэнтам, прывёўшы ў якасьці прыклада асобу Рональда Рэйгана. Цікавая карэкцыя рыторыкі, цікавым застаецца й пытаньне "на што і на каго разьлічвае Лукашэнка ва ўкраінскай выбарчай гонцы?". Балазе па Трампу прагноз беларускага прэзідэнта быў слушным. Але, працэсы якія праходзяць у суседняй краіне значна больш глыбокія за простую зьмену лідэра. Па вялікім рахунку, усё адно каго ЦВК агалосіць пераможцам - палітыка дзяржавы, нават самі асновы існаваньня палітычных элітаў падлягаюць зьмене. Бо, калі паглядзець на вынікі першага туру, недабралі галасоў усе прадстаўнікі старых эліт. Пётр Парашэнка можа перамагчы і можа стаць вельмі эфэктыўным кіраўніком дзяржавы ў разе, калі пойдзе агучаным надоечы шляхам - карэннага перафарматаваньня свайго атачэньня і зьмены падыходаў да існаваньня дзяржаўных інстытутаў. Калі ж, нават атрымаўшы большасьць, пойдзе шляхам цэмэнтаваньня эліт - ягоны час пры ўладзе будзе нядоўгім. Тое самае можна сказаць і пра Зяленскага: спробы сфармаваць каманду са старых кадраў спрычыняць датэрміновыя выбары прэзыдэнта пасьля імпічмэнту ці майдану. А вось фармаваньне цалкам новае палітычнае эліты можа стаць прычынаю посьпеху. Для Аляксандра Лукашэнкі такі варыянт разьвіцьця падзеяў ёсьць прамой пагрозай: - з аднаго боку ён ломіць старыя схемы камунікацыі з кіраўніцтвам суседняе дзяржавы - з другога боку, ён (у выпадку посьпеху Ўкраіны) дае відавочны прыклад для Беларусі і беларусаў - зьмены магчымыя і яны могуць прывесьці да лепшага. Натуральна, што фармаваньне новых эліт, перафарматаваньне дзяржавы ня ёсьць простым працэсам і Ўкраіна можа прайсьці праз цэлую нізку праблемаў. Нельга адкідваць і фактар расейскага ўплыву. Але гэта таксама пазытыў - бачыць чужыя памылкі, рабіць зь іх высновы - прасьцей і таньней, чым набіць гуза на ўласны лоб. Гэтае, а таксама невялікі экскурс у гісторыю зьмены украінскіх эліт і выклаў у відэароліку. Адметкі тэмаў 1:20 Што ўжо адбылося на ўкраінскіх выбарах - адбываецца не барацьба Зяленскага і Парашэнкі, а зьмена элітаў. 1:57 Хто такія "дзеці Кучмы" і як другі прэзідэнт Украіны зламаў хрыбта чырвоным дырэктарам і савецкай намэнклятуры. Што агульнага Між Парашэнка і Януковічам, Юшчанкам ды Мядведчуком? 2:58 Новае пакаленьне ў Украіне стварыла новую сыстэму дзяржаўнага кіраваньня і новую палітычную эліту. Як апазыцыя і ўлада мяняліся месцамі, захоўваючы старыя мэханізмы. 4:00 Чаму схема, якую выбудаваў Кучма стала неактуальнай і якія катэгорыі грамадзянаў апынуліся па-за ўвагай дзяржаўнае сыстэмы. Што такое сёньня украінскі сярэдні клас і што такое сярэдні бізнэс? 5:20 Пазасістэмныя групы стварылі дыскурс Майдану 2018, але не пайшлі ў палітыку. У выніку адбылася чарговая ратацыя элітаў. Каманда Парашэнкі - гэта каманда Юшчанкі, якая выканала праграму 2004 году. 6:20 Зяленскі - праява попыту на новых людзей у палітыцы. Якая доля грамадзянаў Украіны гатовая галасаваць за навічка. І чаму гэта ня так страшна - размова пра тое, каго можна лічыць вінцікам у сыстэме. Ад вызначэньня месца залежыць вызначэньне сыстэмы: ці гэта савок ці гэта мадэрновая дэмакратыя. 7:51 Магчымасьці карэнных зьменаў сыстэмы існаваньня дзяржавы як мэханізму. І чаму сёньня ўжо ня так важна хто ачоліць Украіну, але важна што ён будзе рабіць. Чым гэта важна для Беларусі. 8:40 Што будзе, калі Парашэнка ці Зяленскі пасьля сваёй перамогі паспрабуе апірацца на старыя кадры? І чаму ў выніку новае кадравае палітыкі будзе вельмі шмат відавочна агідных пэрсанажаў. 9:55 Чаму зьмены ў Украіне небясьпечныя асабіста для Аляксанда Лукашэнкі? І чаму сёньня верагоднасьць зьменаў вельмі вялікая. 11:50 Чым працэсы ў Украіне могуць быць карыснымі для апанэнтаў Лукашэнкі ў Беларусі? Жадаеце ведаць болей? Мой акаўнт у Фэйсбук: ttps://www.facebook.com/Ihar.Tyshkevich Мой тэлеграм-канал: https://t.me/slavic_brotherhood