На ўзгорку кар'ера насупраць мясакамбіната, у пачатку праспекта Дзімітрава, знаходзіцца месца, дзе ад 1918 па канец 30-х расстрэльвалі і хавалі людзей - ахвяраў камуністычнага рэжыму. Пакуль гэта адзінае месца, якое афіцыйна прызнанае КДБ і ўладамі, дзе ў Магілёве праводзіліся расстрэлы. Каб ушанаваць памяць магілёўцаў, рэпрэсаваных, закатаваных, расстраляных карнай сістэмай НКВД, 4 лістапада тут, каля Крыжа памяці, сабраліся актывісты партый БНФ, БХД, АГП, руху "За Свабоду", іншыя неабыякавыя людзі. Лідары партый - Віталь Макаранка (БНФ), Уладзімір Шанцаў (АГП) і Алег Аксёнаў (БХД) выступілі з жалобнымі прамовамі. Яны яшчэ раз нагадалі пра тыя жахлівыя часы і падзеі, пра гісторыю гэтага месца, правялі паралелі з нашым часам, бо і зараз, хоць і не з такой жорсткасцю, але гэтак жа пераследуюцца іншадумцы. Пасля выступу палітыкаў некаторыя ўдзельнікі прачыталі малітву і ўшанавалі ахвяр рэпрэсій хвілінай маўчання. Было праведзена кароткае набажэнства, асвечаны мемарыяльны знак, Крыжы і самое памятнае месца пакут нашых бязвінных суайчыннікаў. Алесь Сабалеўскі http://6tv.by/zhalobnaya-akcyya-kalya-memaryyalu-axvyaram-stalinskix-represij-videa/