Паўгода таму Алана Гебрэмарыям скончыла Медычны ўніверсітэт у Мінску. Дзяўчына вывучылася на стаматолага, але па спецыяльнасці пакуль што не працуе, бо палітыка апынулася важнейшай. Лукашэнка казаў, што ў Палаце прадстаўнікоў не хапае моладзі. Значыць, у Аланы ёсць шансы? Алана Гебрэмарыям ідзе ў парламент па Грушаўскай выбарчай акрузе №98 у Мінску. Яна прадстаўляе Моладзевы блок. Кандыдатка ў дэпутаты выдатна размаўляе па-беларуску, а сваю праграму будуе на вырашэнні праблем беларускай моладзі. Пасля абрання ў Палату прадстаўнікоў яна будзе дамагацца скасавання скандальнага “закона аб адтэрміноўках” і рэформы антынаркатычнага заканадаўства. Адна з яе мэтаў — каб маладыя беларусы больш не траплялі ў турму на доўгія гады за марыхуану.