Мова, культура, мастацтва, літаратура. За кожным словам стаяць жывыя сапраўдныя людзі, якія нясуць у свет усё лепшае, што нарадзіла за столькі гадоў беларуская гісторыя. Код нацыі. Закрыць, забараніць, запужаць, выціснуць з жыцця. Абрабаваць беларускую нацыю — злачынства, якому няма сувымернага пакарання. Будучыя пакаленні на доўгія стагоддзі запомняць тыя канкрэтныя твары і імёны, якія сваімі рукамі свядома здзяйсняюць гэтую жудасць. Мне пашчасціла ў жыцці дакрануцца да сферы культуры. Сустрэць на сваім жыццёвым шляху самых шчырых, таленавітых і неабыякавых людзей. Бо толькі неабыякавы чалавек можа быць стваральнікам мастацтва. Толькі неабыякавы чалавек можа сёння сказаць: «не» пераследу за думкі і погляды, «не» гвалту, «не» злачынствам, «не» закрыццю Купалаўскага. Ён не пагадзіцца з тым, што нашых дзеячоў культуры ствяць як цялят у загон і застаўляюць жаваць жуйку. Мы не хочам жыць за агароджай. Заўсёды чалавек, асоба сферы культуры змагаўся за ўласную свабоду і свабоду іншых. Няўжо мы будзем маўчаць? Няўжо мы будзем танчыць і спяваць, калі нашых сяброў і паплечнікаў б’юць і катуюць, арыштоўваюць і закрываюць ім рты? Ці мы зможам з вамі пазней глядзець адзін аднаму ў вочы? У кожнага з нас ёсць свае абавязкі, засцярогі, але разам мы — грамада. Разам мы можам пераадолець усё, бо мы з вамі — культура краіны, а не тыя, хто затыкае нам рот; не тыя, хто нас прымушае і запалохвае. Наш класік Караткевіч пісаў: «зло, якое цярпліва выносілі як штосьці непазбежнае, робіцца нясцерпным пры думцы, што можна ад яго вызваліцца». І сёння кожны беларус адчуў сваю магутнасць, сваю сілу, узрошчаную легендарнымі продкамі, і той вялікі гонар звацца Беларусам. І можна паспрабаваць звольніць і выгнаць усіх, але тая моц, якая за апошні час паяднала беларусаў, ужо стала бессмяротнай. І ніякаму жывому чалавеку ў свеце непадуладна сцерці яе з зямлі. Нас не здушыць нуда, Не сагне нас бяда, І не будзе ўладаць доля намі. Гэй, ніколі, нідзе, Гэй, ніколі, нідзе Беларусы не будуць рабамі! Словы Песняра Купалы (1920-1925) Заклікаю вас усіх падтрымаць адзін аднаго і падпісаць адкрыты ліст работнікаў сферы культуры. «Культура супраць гвалту». Я супраць, а вы? Пераходзьце па спасылцы @bel_culture і пакіньце Ваш подпіс.