Настаў наш гістарычны час да барацьбы! Сёння гадавіна пачатку паўстання вольных народаў нашага рэгіену — беларускага, украінскага, польскага, літоўскага — супраць расійскага імперыялізму. 160 гадоў таму нацыянальна-вызваленчыя паўстанні былі заканамерным гістарычным працэсам. І дзякуючы таму мы зараз маем сваю дзяржаву, маем права называцца беларусамі і ганарыцца сваімі нацыянальнымі героямі. Наш нацыянальны герой — Кастусь Каліноўскі — праз паўстанне на тэрыторыі Беларусі натхніў наступныя пакаленні на барацьбу за справу беларушчыны. Як бы зараз не намагалася расійская неаімперыя зноў знішчыць усё беларускае на нашай зямлі, але тая кроў і тыя пакуты, якія перанеслі нашыя нацыянальныя героі, усё гэта была недарма. Як бы не намагаліся так званыя «браты» казаць пра тое, што нас не існуе, як бы не цягнулі зноў у свае абдымкі, каб задушыць – усё роўна беларусы паўставалі за зваю дзяржаўнасць. 160 гадоў таму з косамі пад кіраўніцтвам Кастуся Каліноўскага. У часы БНР змагаліся з бальшавіцкай навалай пад нацыянальнымі сімваламі. Стваралі незалежную Рэспубліку Беларусь пад бел-чырвона-белым сцягам і Пагоняй у 90-я. Выйшлі пад гэтым жа сцягам за сваю годнасць у 2020 годзе. А зараз ваяры пад імем Кастуся Каліноўскага і пад Пагоняй бароняць украінскую зямлю ад расійскіх акупантаў. Падмурак гэтай гістарычнай барацьбе за права не быць скотам і мець сваю дзяржаву быў закладзены тады, 160 гадоў таму. Упэўнены, што беларусы, як і іншыя еўрапейскія нацыі, здабылі свае права на сапраўдную незалежнасць. Але як зараз украінцы яго адстойваюць, так і беларусы павінны будуць павярнуць гэтае права сабе. Таму як і 160 гадоў таму — вокліч за «Нашу і вашу свабоду» набывае вялікі сэнс і вялікую каштоўнасць. Бо зараз вырашаецца лёс не толькі Беларусі, але і ўсей Еўропы. Ад кожнага беларуса залежыць шмат, у гэта верыў Кастусь Каліноўскі, таму і вырашыў ахвяраваць жыццё за веру у наш народ і ў нашу Беларусь! Настаў наш гістарычны час да барацьбы. Каго любіш? Люблю Беларусь! То ўзаемна. #беларусь #латушка #каліноўскі Час барацьбы