www.budzma.org У пошуках цмока! Праект "У пошуках цмока" агульнанацыянальнай кампаніі "Будзьма беларусамі" выходзіць на новы этап! У папярэдніх частках мы даведаліся, што цмок -- гэта ці не больш натуральны сімвал Беларусі, чым бусел ці зубр! Альбо, прынамсі, хай бусел з зубром застаюцца сабе недзе побач з цмокам. За гэты час мы паспелі пачуць самыя розныя водгукі на наш праект -- адныя ставяцца скептычна, іншыя ганяць, але шмат людзей успрынялі нашую "цмачыную" інміцыятыву захоплена і пазітыўна! Што казаць, калі за гэты час найлепшая баскетбольная каманда Беларусі была перайменаваная ў "ЦМОКІ", а ўлады Лепеля абмяркоўваюць цмока ў якасці сімвала краю... Надыйшоў час убачыць беларускага цмока! Але дзе яго шукаць? Для гэтага кампанія "Будзьма беларусамі!" звярнулася да шэрагу экспертаў -- даследчыкаў, фатографаў, вандроўнікаў, журналістаў... Адным словам, "цмоказнаўцаў"! Мы папрасілі шаноўных экспертаў скласці маршрут -- куды найлепей ехаць у пошуках беларускага цмока? Паралельна суразмоўцы распавялі нам проста незлічоную кролькасць цікавостак пра айчынных цмакоў -- і колькі тыпаў існуе, і дзе яны звычайна жывуць, і як іх звалі, і ці былі сярод іх "цмачыхі"... Гутаркі будуць раз на тыдзень з'яўляцца на сайце "Будзьма беларусамі!" Калі ўсе яны ўбачаць свет, мы прапануем вам выбраць з усіх названых экспетамі мясцін найбольш "цмачыныя" на ваш погляд -- і аб'яднаем іх у маршрут! Найперш гэты маршрут выпрабуюць журналісты (кажуць, што яны найменш смачныя і беларускія цмокі ядуць іх неахвотна). А потым па гэтым маршруце зможа паехаць кожны з вас!