www.adnak.by/ Фестываль AD.NAK! прадставіў настальгічную відэасправаздачу Арганізатары Фестывалю AD.NAK! - 3 размяцілі ў Інтэрнэце відэасправаздачу з дня урачыстай цырымоніі ўзнагароджання. У ролік увайшлі самыя яскравыя моманты адукацыйнай праграмы Фестывалю, інтэлектуальнага батла "Цмокі супраць Буслоў" і, канешне, святочнай "раздачы клічнікаў". Цяпер, калі фестывальныя жарсці канчаткова ўлягліся, з настальгіяй мы фіксуем у памяці AD.NAK! -- 3 і пачынаем новы цыкл працы. Працы над AD.NAK! -- 4. У візуальным падсумаванні летняга свята беларускай рэкламы яго ўдзельнікі змогуць адшукаць сябе ды зноў адчуць атмасферу імпрэзы. Нагадаем, што сёлетні фестываль стаў рэкордным па колькасці пададзеных работ і ўдзельнікаў (болей за 300 і 100 адпаведна), таму, згодна з сусветнымі стандартамі ўпершыню была выкарыстана прэ-мадэрацыя. Каб не збаўляць тэмпаў росту заклікаем усіх зацікаўленых ужо сёння падумаць і паралельным курсам з аргкамітэтам распачаць падрыхтоўку сваіх працаў да AD.NAK! -- 4. "У гэтым годзе мы звярнулі асаблівую ўвагу на ўдзельнікаў з рэгіёнаў і вынікі фестывалю сталі добрай глебай для аналітычных развагаў. Беларускі маркетынг не мае дэфіцыту ідэяў, але яму бракуе напрацаваных схемаў іх рэалізацыі. Часта праектам бракуе пастаноўкі канкрэтных мэтаў камунікацыі, і таму яны не становяцца моцнымі фестывальнымі працамі. Аргкамітэт Фестывалю працягне працу над раскрыццём крэатыўнага патэнцыялу беларускай рэкламістыкі, магчыма, не толькі зборам лепшых працаў, але і асветніцкімі мерапрыемствамі", -- адзначыў кіраўнік рэсурсу Marketing.by, аднаго з суарганізатараў Фестывалю AD.NAK!, Сяргей Скараход. У межсезон'і паміж дзвюма апошнімі фестывалямі сябры аргкамітэта ўжо мелі досьвед прэзентацый Фестывалю ў Гродна, Магілёве, Брэсце і Гомелі. З 2012 года ўнесеныя змены і ў рэгістрацыйныя формы фестывалю дзеля таго, каб вызначыць, які з рэгіёнаў найбольш крэатыўны. "Нам вельмі прыемна падзяліцца ўспамінам з Фестывалю AD.NAK! з мінулымі і будучымі яго ўдзельнікамі і ўсімі зацікаўленымі. З чатырох годаў дзейнасці кампаніі "Будзьма беларусамі!" тры мы ладзім Фестываль, які стаў знакавым для нас мерапрыемствам. Нам вельмі прыемна бачыць запатрабаванасць і самаго Фестывалю і ідэяў, якія ім прапагандуюцца. Шчыра нечаканым для нас стаў рост колькасці працаў у крызісны час, спадзяемся што і AD.NAK! -- 4 не пазбавіць нас звычкі прыемна здзіўляцца.", -- дадае Ніна Шыдлоўская, адзін з каардынатараў кампаніі "Будзьма беларусамі!".