У фантане непадалёк ад Камсамольскага возера ў парку Перамогі 12 чэрвеня адбылася чарговая бойка «Мокрых войнаў». Дзясяткі маладых людзей з тазікамі, вёдрамі, воднымі пісталетамі і бутэлькамі з вадой аблівалі адзін аднаго. З адзінай мэтай -- каб сухіх людзей не засталося. У адмысловай групе ў кантакце было запісана каля 4 тысяч патэнцыйных удельнікаў. Ці то прагноз надвор'я падвёў, ці то большасць папросту перадумала выходзіць з утульных кватэраў, аднак флеш-моб сабраў значна меней удзельнікаў, чым планавалася. Аднак гэта ніяк не паўплывала на настрой прысутных: пазітыву і драйву хапіла роўна настолькі, каб «сухіх людзей не засталося» (рэд — лозунг флэш-мобу), чаму паспрыяў таксма яшчэ і цёплы летні дожджык. Як заяўляюць арганізатары мерапрыемства, «мокрыя войны» не маюць ні палітычных, ні эканамічных, ні рэлігійных мэтаў. Мэта «Мокрых войнаў» — хоць бы на гадзіну адцягнуць людзей ад штодзённай руціны і парадавацца гарачаму лету ў Мінску.