У Віцебскім абласным краязнаўчым музеі 15 сакавіка 2022 г. адкрылася выстава "РУПЛІВЕЦ БЕЛАРУСКАЙ ДАЎНІНЫ", прысвечаная 170-годдзю Аляксея Сапунова, аднаго з найлепшых археографаў і краязнаўцаў Беларусі канца ХІХ і пачатку ХХ стагоддзя. Вельмі рады, што ўпершыню ў Віцебску атрымалася прадставіць каштоўныя матэрыялы з яго колішніх калекцый, якія сёння зберагаюцца не толькі ў самім Віцебску, але і былі прывезены з Мінска - з Нацыянальнай бібліятэкі Беларусі. Падчас адкрыцця выставы выступілі намеснік дырэктара музея В.А.Шышанаў, вядомы віцебскі краязнавец, кандыдат гістарычных навук Мікалай Васільевіч Півавар, вядомы культуролаг і кнігазнавец Алесь Суша і іншыя. На адкрыцці выставы прысутнічалі прадстаўнікі віцебскай грамадскасці, навукоўцы, студэнты. Прысутнічала таксама аўтар кнігі пра А. Сапунова Людміла Хмяльніцкая. У сакавіку 2022 года спаўняецца 170 гадоў з дня нараджэння Аляксея Парфёнавіча Сапунова (1852–1924) – краязнаўцы, археографа, выкладчыка, грамадскага дзеяча, аднаго з выдатных беларускіх гісторыкаў канца XIX – пачатку XX стагоддзя. Аляксей Сапуноў – ураджэнец Віцебшчыны, адзін з самых захопленых і крапатлівых даследчыкаў роднага краю. Ім напісана каля 50 кніг і брашур, а таксама дзясяткі навуковых артыкулаў і нарысаў па гісторыі, этнаграфіі, археаграфіі Віцебскага Падзвіння. Навуковец упершыню выявіў, сабраў, пераклаў і выдаў вялікі пласт першакрыніц па гісторыі краю. Найбольш вядомымі выданнямі з'яўляюцца кнігі «Витебская старина» і «Река Западная Двина» Выставачны праект, прысвечаны кніжнай спадчыне А.П. Сапунова, ажыццявілі Нацыянальная бібліятэка Беларусі і Віцебскі абласны краязнаўчы музей. У праекце аб'яднаны часткі дзвюх калекцый: матэрыялы з асабістага архіва А.П. Сапунова з фондаў музея і кніжнага збору А.П. Сапунова з фондаў бібліятэкі. Нацыянальнай бібліятэкай Беларусі прадастаўлена 47 экзэмпляраў з кніжнай калекцыі А.П. Сапунова, сярод якіх друкаваныя выданні гісторыка і выданні з уладальніцкім надпісам, дароўнымі надпісамі А.П. Сапунова ці да яго. Выданні адзначаны характэрным подпісам уладальніка або спецыяльнай рэльефнай пячаткай. У рамках выставы жыхары і госці Віцебска змогуць не толькі пазнаёміцца з кніжнай спадчынай А.П. Сапунова, але і ўпершыню ўбачыць кнігі з яго асабістай бібліятэкі, якія былі набыты Беларускай дзяржаўнай і ўніверсітэцкай бібліятэкай (сучасная Нацыянальная бібліятэка Беларусі) у 1923 годзе. Набыццё кнігазбору А. Сапунова, а найперш Статута ВКЛ 1588 года, было справай гонару і вялікім клопатам першага дырэктара Нацыянальнай бібліятэкі Іосіфа Сіманоўскага. Закупка кнігазбору А.Сапунова стала адным з найбольш каштоўных набыткаў бібліятэкі на раннім этапе яе існавання. Некаторыя з тых кніг дагэтуль захаваліся і вядомыя. Хаця не ўсе. І не ўсе з захаваных знаходзяцца сёння ў Нацыянальнай бібліятэцы (як і згаданы Статут). Віцебскі абласны краязнаўчы музей прэзентуе больш за 200 унікальных дакументаў з асабістага архіва А.П. Сапунова, звязаных з выдавецкай, выкладчыцкай, навуковай і грамадскай дзейнасцю вучонага. Увазе наведвальніка прадстаўлены дакументы і рукапісы па гісторыі Віцебска, Полацка, іншых гарадоў Віцебскай губерні, матэрыялы па гісторыі праваслаўнай царквы, па гісторыі Прыбалтыкі, курсы лекцый для навучальных устаноў, літаграфіі да розных выданняў А.П. Сапунова. Сапраўднымі рарытэтамі на выставе з'яўляюцца «Кніга прывілеяў Віцебска», рукапіс «Гісторыя Віцебска», а таксама асабісты альбом А.П.Сапунова. Упершыню на выставе прадстаўлены клішэ са збору Віцебскага губернскага статыстычнага камітэта, якія выкарыстоўваліся ў публікацыях А.П. Сапунова.