Запрашаем прыняць ўдзел у навукова-практычным семінары «Ураджэнцы роднага краю», які адбудзецца 3 лютага 2022 года ў Нацыянальнай бібліятэцы Беларусі. Мерапрыемства прымеркавана да ўшанавання памяці сяброў літаб’яднання “Маладняк”: Алеся Гурло, Яна Скрыгана, Міхася Зарэцкага, Змітрака Бядулі, Уладзіміра Дубоўкі, Кузьмы Чорнага, Пятра Глебкі, Петруся Броўкі і іншых. На навукова-практычным семінары пройдзе прэзентацыя віртуальнага раздзела праекта “На хвалі часу, у плыні жыцця”, прысвечанага Алесю Гурло (1892–1938), юбілей якога адзначаецца 31 студзеня. Арганізатары мерапрыемства: Нацыянальная бібліятэка Беларусі, Беларускі дзяржаўны архіў-музей літаратуры і мастацтва, Выдавецкі дом «Звязда» (газета «ЛіМ»), Дзяржаўны музей гісторыі беларускай літаратуры. Час правядзення: 3 лютага 2022 г., запланаваны час правядзення – 11.00–14.00. Мерапрыемства пройдзе ўжывую з трансляцыяй на платформе YouTube. У сувязі з эпідэміялагічнай сітуацыяй удзел у семінары магчымы ў вочным і завочным фармаце. На працягу трох гадоў Нацыянальная бібліятэка Беларусі разам з партнёрамі: Дзяржаўным музем гісторыі беларускай літаратуры, Беларускім дзяржаўным архівам-музем літаратуры і мастацтва, Выдавецкім домам «Звязда» (часопісам «Маладосць», цяпер – газетай «Літаратура і мастацтва») – працуе над маштабным рэспубліканскім праектам «На хвалі часу, у плыні жыцця», які прымеркаваны да 100-годдзя Усебеларускага літаратурнага аб’яднання паэтаў і пісьменнікаў «Маладняк». За гэты час было створана 9 віртуальных раздзелаў да юбілеяў «маладнякоўцаў»: Валерыя Маракова, Адама Бабарэкі, Уладзіміра Хадыкі, Уладзіміра Дубоўкі, Кузьмы Чорнага, Яна Скрыгана, Андрэя Александровіча, Змітрака Бядулі, Міхася Зарэцкага. Падчас мерапрыемства будзе прэзентаваны 10 раздзел, прысвечаны Алесю Гурло. Літаратурная арганізацыя «Маладняк» адыграла вялікую ролю ў развіцці беларускай літаратуры. З дзейнасці ў гэтай арганізацыі пачыналі творчы шлях многія буйнейшыя пісьменнікі БССР. З яе выйшлі такія знакамітыя асобы, як Пятрусь Броўка (1905–1980), Міхаcь Лынькоў (1899–1975), Уладзімір Дубоўка (1900–1976), Янка Скрыган (1905–1992), Пятро Глебка (1905–1969) і іншыя. Мадэратар: Суша Аляксандр Аляксандравіч, намеснік генеральнага дырэктара Нацыянальнай бібліятэкі Беларусі, кандыдат культуралогіі 11.00–11.05 Адкрыццё семінара 11.05–11.10 Прывітальнае слова (Суша Аляксандр Аляксандравіч, намеснік генеральнага дырэктара Нацыянальнай бібліятэкі Беларусі, кандыдат культуралогіі) 11.10–11.20 Віртуальны праект “На хвалі часу, у плыні жыцця”: дасягненні, планы 2021–2022 гг. (Лаўрык Таццяна Анатольеўна, загадчык сектара Нацыянальнай бібліятэкі Беларусі, магістр філалагічных навук) 11.20–11.35 Слова пра майго бацьку Яна Скрыгана (Скрыган Галіна Іванаўна, дачка пісьменніка Яна Скрыгана) 11.35–11.45 Ян Скрыган: вяртанне на малую радзіму (Васілевіч Галіна Мікалаеўна, дырэктар Каменскага вучэбна-педагагічнага комплекса дзіцячы сад–сярэдняя школа; Тагіль Ірына Іосіфаўна, кіраўнік гісторыка-краязнаўчага музея «Бацькаўшчына» Каменскага вучэбна-педагагічнага комплекса дзіцячы сад–сярэдняя школа) 11.45–11.55 Параднёны са Шклоўшчынай: Міхась Зарэцкі (Рэентовіч Таццяна Міхайлаўна, бібліятэкар аддзела маркетынга Шклоўскай раённай бібліятэкі) 11.55–12.05 Максім Багдановіч і Змітрок Бядуля ў «Беларускай хатцы» (Бараноўскі Міхаіл Аляксандравіч, загадчык Літаратурнага музея Максіма Багдановіча) 12.05–12.15 Наша бібліятэка носіць яго імя (Сяменас Людміла Францаўна, бібліятэкар Пастаўскай дзіцячай бібліятэкі імя Уладзіміра Дубоўкі) 12.15-12.25 Ушанаванне памяці Кузьмы Чорнага на радзіме (Радкевіч Вольга Уладзіміраўна, бібліятэкар Цімкавіцкай сельскай бібліятэкі) 12.25–12.35 Ушанаванне памяці Міколы Нікановіча (Дзяркач Яўгенія Адамаўна, член сям’і пісьменніка М. Нікановіча) 12.35–12.45 Мемарыяльны кабінет П. Ф. Глебкі – люстэрка часу (Колас Радзівон Аляксандравіч, культуролаг аддзела маркетынгавых камунікацый Цэнтральнай навуковай бібліятэкі імя Я. Коласа НАН Беларусі) 12.45–12.55 Ушанаванне памяці пісьменнікаў-маладнякоўцаў у зале беларускай літаратуры Нацыянальнай бібліятэкі Беларусі (Давідоўскі Дзмітрый Мікалаевіч, вядучы бібліятэкар Нацыянальнай бібліятэкі Беларусі) 12.55–13.05 Літаратурны музей Петруся Броўкі: ушанаванне памяці (Бадылевіч Карына Аляксандраўна, навуковы супрацоўнік Літаратурнага музея Петруся Броўкі) 13.05–13.15 «Тут слова Труса гучыць, не змаўкае…»: ушанаванне памяці пісьменніка-земляка Паўлюка Труса (Драчан Аксана Валер’еўна, дырэктар Уздзенскай цэнтральнай раённай бібліятэка імя П. Труса) 13.15–13.25 Папулярызацыя творчасці сябровак літаб’яднання «Маладняк» (Данільчык Аксана Аляксееўна, літаратуразнавец, паэтэса, кандыдат філалагічных навук) 13.25–13.30 Падвядзенне вынікаў, дыскусія