Андрэй Александровіч – паэт, публіцыст, дзіцячы пісьменнік, перакладчык, адзін з заснавальнікаў літаратурнага аб’яднання “Маладняк”. Гэтай асобе Нацыянальная бібліятэка прысвяціла новы віртуальны раздзел праекта. У Нацыянальнай бібліятэцы Беларусі адбылася анлайн-прэзентацыя літаратурнай спадчыны Андрэя Александровіча. Пра адкрыццё новага раздзела , які прысвечаны 115-годдзю паэта, распавяла галоўны бібліёграф інфармацыйна-аналітычнага аддзела Юлія Амосава. Прагучала паведамленне загадчыцы інфармацыйна-аналітычнага аддзела Таццяны Лаўрык пра сумесны праект “На хвалі часу, у плыні жыцця” і празаічныя творы пісьменніка. Намеснік генеральнага дырэктара Нацыянальнай бібліятэкі Беларусі Алесь Суша расказаў пра кніжны фонд А. Александровіча, які захоўваецца ў Нацыянальнай бібліятэцы Беларусі, і дакументы пісьменніка ў архівах краіны. Мерапрыемства завяршылася выступленнем вядучага навуковага супрацоўніка Беларускага дзяржаўнага архіва-музея літаратуры і мастацтва Віктара Жыбуля, які даследуе паэтычную спадчыну Андрэя Александровіча. Запрашаем прагледзіць запіс мерапрыемства і даведацца больш пра героя новага віртуальнага раздзела! Карыстальнікі пазнаёмяцца з асаблівасцямі лёсу паэта, яго літаратурнай дзейнасцю. У фондах бібліятэкі захоўваецца ўся прыжыццёвая спадчына А. Александровіча. У праекце размешчаны 25 алічбаваных кніг, сярод якіх зборнікі вершаў: “Па беларускім бруку” (1925), “Прозалаць” (1926), “Угрунь” (1927), “Гудкі” (1930), паэма “Цені на сонцы” (1930), драматычная паэма “Напор” (1933), вершаваны зборнік “Узброеныя песні” (1936), шэраг твораў для дзяцей, а таксама яго проза: раман “Ваўчаняты” (1925), які напісаны ў суаўтарстве з “маладнякоўцамі” А. Вольным і А. Дударом, зборнік апавяданняў “Сутарэнне” (1925) і іншыя творы. Цікавай будзе інфармацыя пра пастаноўку драматычнай паэмы А. Александровіча “Напор” рэжысёрам М. Міцкевічам і акцёрамі БДТ-2 (Віцебск), матэрыял па ўшанаванні памяці паэта, рэпрадукцыі партрэтаў А. Александровіча ў творчасці мастакоў. У раздзеле сабрана літаратура пра жыццё і творчасць А. Александровіча. Для даследчыкаў творчасці паэта, а таксама для ўсіх зацікаўленых, мы прапануем поўныя тэксты матэрыялаў сучасных аўтараў, якія робяць праект “жывым” і актуальным. Тут вы знойдзеце копіі артыкулаў В. Жыбуля і Г. Севярынец, размешчаныя з дазволу аўтараў. Адзначым, што падраздзел публікацый сучасных даследчыкаў у межах усяго праекта перыядычна папаўняецца новымі матэрыяламі, таму запрашаем да ўдзелу навукоўцаў, даследчыкаў і студэнтаў, якія цікавяцца творчасцю Андрэя Александровіча і іншых “маладнякоўцаў”. Набліжае асобу паэта да нас “Фотагалерэя”, якая пазнаёміць з фотаздымкамі, выявамі дакументаў, рукапісаў, віншавальных паштовак, асабістых рэчаў А. Александровіча, што захоўваюцца ў фондах партнёраў праекта. Прадстаўлены фота Андрэя Іванавіча розных перыядаў жыцця, а таксама яго родных: сястры Алесі, літаратуразнаўцы і педагога, жонкі паэта, яго дзяцей і ўнукаў, сяброў і паплечнікаў. У праекце размешчаны старонкі з дзённіка Андрэя Александровіча, а таксама яго ліставанне з фондаў Беларускага дзяржаўнага архіва-музея літаратуры і мастацтва, дзе можна пазнаёміцца з яго лістамі да празаіка і перакладчыка І. Барашкі, а таксама лістамі артысткі П. Мядзёлкі і пісьменніцы А. Васілевіч да Андрэя Александровіча. Даследчыкам даецца магчымасць спампоўваць дакументы з мэтай іх далейшага выкарыстання са спасылкай на захавальнікаў дакументаў. Таймкоды: 00:00 Пачатак. Акцыя да 115-годдзя А. Александровіча 02:58 Віртуальны праект “На хвалі часу, у плыні жыцця” (Таццяна Лаўрык) 06:26 А. Александровіч і яго проза (Таццяна Лаўрык) 14:21 Творчая спадчына А. Александровіча ў адкрытым доступе (Юлія Амосава) 32:04 Вядомыя крыніцы з Бел. дзярж. архіва-музея літаратуры і мастацтва (Алесь Суша) 34:25 Новыя крыніцы з Нацыянальнага архіва РБ (Алесь Суша) 39:53 Голас і ўнікальная архіўная кінахроніка з 1936 г. (Алесь Суша) 43:42 Што новае пра лёс Александровіча могуць расказаць пазнакі на яго кнігах (Алесь Суша) 1:02:44 А.Александровіч - паэт-урбаніст (Віктар Жыбуль) 1:37:24 Падсумаванне Спасылка на сайт раздзела пра А.Александровіча: https://www.nlb.by/by/infarmatsyynyya-resursy/elektronnyya-infarmatsyynyya-resursy/resursy-natsyyanalnay-bibliyateki-belarusi/virtualnyya-praekty-vysta-ki-i-kalektsyi/virtualnyya-praekty-bibliyateki/virtual/na-khvali-chasu-u-plyni-zhytstsya/common/369479/