Старажытнае свята, прысвечанае заканчэнню ўборкі збожжа, адзначалася напярэдадні астранамічнага восеньскага раўнадзенства 21 верасня. У гэты дзень вяскоўцы выраблялі Багач – сяўнічок з зернем, у які ўстаўлялася свечка. Сяўнічок разам са снапком праносілі па вёсцы і ставілі пад абразамі на покуці ў хаце добрых гаспадароў. У хаце выбранага гаспадара ладзілі вялікае свята, якое суправаджалася спевамі, танцамі і гульнямі. Запіс з відэаархіва праекта «Традыцыйны строй» быў зроблены ў кастрычніку 2022 года падчас супольнай вандроўкі праектаў «Традыцыйны строй» і «Палескі Палын» разам з Ганцавіцкім домам рамёстваў.