Дзе праходзіла савецка-польская мяжа ў 1920-1930-я гады? Хто яе ахоўваў з боку БССР і Польшчы? Як адбывалася перамяшчэнне насельніцтва праз “кардон”? Што насілі кантрабандысты ў торбах-носках? Дзе нарадзіўся знакаміты верш Уладзіміра Маякоўскага пра савецкі пашпарт? Пра ўсё гэта, а таксама шматлікае іншае даведаюцца ўдзельнікі вайскова-гістарычнага фэсту, які пройдзе ў філіяле Музея Янкі Купалы ў Вязынцы 22 ліпеня 2018 года ў 12-30. Галоўнай адметнасцю мерапрыемства стане рэканструкцыя памежнага пераходу міжваеннага часу, на якім будзе праводзіцца праверка дакументаў, памежкамісарская сустрэча і абмен перабежчыкамі. Члены Групы вайскова-гістарычнай рэканструкцыі “Беларусы ў Войску Польскім” прадэманструюць гасцям імпрэзы аўтэнтычную ўніформу жаўнераў Памежных войскаў НКУС БССР, а таксама польскага Корпуса аховы памежжа. Кандыдат гістарычных навук Ігар Мельнікаў пакажа ўнікальныя артэфакты, здымкі і матэрыялы са свайго прыватнага архіва. Кожны ўдзельнік зможа атрымаць унікальную копію даваеннага пашпарта адной з еўрапейскіх краін і паставіць у яго на памяць пячатку аб перасячэнні даваеннага “кардона”. Запрашайце сяброў, знаёмых, бярыце сям’ю, дзяцей і прыязджайце 22 ліпеня o 12-30 у Музей-запаведнік у Вязынцы (в. Вязынка, Маладзечанскі раён, Мінская вобласць). Удзел у мерапрыемстве каштуе роўна столькі, колькі каштуе ўваходны білет у вязынскі музей – 2 рублі. Пачатак мерапрыемства 22 ліпеня 2018 года ў 12-30.