Амаль адразу пасьля акупацыі Латвіі Савецкім Саюзам сям'ю Гунтыса Ўлманіса адправілі ў сыбірскую высылку. Будучаму прэзыдэнту незалежнай Латвіі было тады два гады. Праз пяцьдзесят зь лішнім гадоў менавіта ён правёў пасьпяховыя перамовы аб вывадзе расейскіх войскаў з Латвіі. Некалькі пазьней Латвія пад яго кіраўніцтвам падала заяўку на сяброўства ў ЭЗ і НАТА. Улічваючы вялікую колькасьць расейцаў, якія пастаянна пражываюць у Латвіі, Улманіс імкнуўся ўсталяваць з Расеяй прагматычныя адносіны. Сёньня 76-гадовы экс-прэзыдэнт кажа, што Захад ніколі не разумеў Расею, яе адносіны да дэмакратыі і да ўкраінскага пытаньня.