19-гадовага жыхара Гомля, студэнта ГДУ ім. Ф. Скарыны Ўладзіслава Мельнікава затрымаў АМАП 14 ліпеня. Разам зь ім у цэнтры гораду затрымалі каля дзесяці чалавек. У той дзень у Гомлі праходзіла акцыя салідарнасьці. Сябры Ўладзіслава сьцьвярджаюць, што ня ўдзельнічалі ў акцыі, проста гулялі ў цэнтры гораду. 15 ліпеня ў гомельскіх судах адбыўся разгляд адміністрацыйных спраў. Затрыманыя былі пакараныя арыштамі ад 3 да 10 сутак. Сябры Ўладзіслава і ягоныя бацькі не маглі знайсьці маладога чалавека – ані ў судах, ані ў ІЧУ ім не давалі ніякай інфармацыі пра Ўладзіслава. Толькі вечарам 15 ліпеня бацькі і сябры даведаліся, што Ўладзіслаў пакараны арыштам на 3 сутак.