Sož on stage: Baisan / Paul Szybieński / Andy Peczynski / Mikhail Karpenka. Video — Yauhen Shapchyts, mixing and mastering — Paul Szybieński. Merch / support the band — https://sozband.bandcamp.com/ Алесь «Baisan» Плотка, лісты невядомаму слухачу. Ліст чацвёрты, 01.10.2025, Вільня. У праграме з асноўных дзесяці (без уліку рэдкіх для выканання трэкаў ці іх версій) песень гэтага перыяду “Эрас і Танатас” – безумоўны трэк-водападзел паміж матэрыялам яшчэ гомельскім-гомельскім і ўжо варшаўскім. Тэкст, напісаны ўвесну-2020 у Гомелі, як прадчуванне вялікіх грамадзянскіх зрухаў, напоўніцу загучаў акурат цягам пяцігодкі, калі дайшоў да найлепшай формы жывога выканання і стаў кліпам (https://www.youtube.com/watch?v=QyLY2TYlEOQ). Другім пастановачным кліпам каманды, які стаў па-свойму прарочым не толькі для гурта “Сож”, але й для ўсіх музыкаў, што змагаюцца са сваімі дэманамі кожны ў свой метад. І не заўжды перамагаюць. З трэка “Эрас і Танатас” пачаўся паўнавартасны ўдзел у гурце Paul Szybieński, які вызначыў філасофію гучання каманды. Павел з’явіўся напрыканцы працы над дэбютным міні-альбомам з болей тэхнічнай дапамогай, але пасля змог падзяліцца ўсёй змрочнай школай саунда, якую прынёс з сабою. Гэта адзіны ўдзельнік каманды, які вырас на сапраўдным пост-панку (if you know what I mean) і заходніх абразцах музыкі. Дык вось пра змрок. Тры дні ў Вільні была тыповая віленская восень, з дробнамярзотным, як беларускі літпрацэс, дожджыкам, адсутнасцю святла і адпаведным настроем. Сёння выйшла сонейка і на душы стала цёпла. Я даўно згубіў сэнс гэтых літараў і слаба разумею, хто і калі будзе перачытваць гэтыя цмяныя радкі і блытаныя факты біяграфіі гурта “Сож”, але калі гэтая асоба будзе тут, у кропцы, дзе я стаў гэтым тэкстам, я дзялюся з ім/ёй гэтай цяплынёй і наіўнасцю першых праменьчыкаў кастрычніка. *** эрас і танатас эрас і танатас кружаць па раёне эрас і танатас пагалілі скроні эрас і танатас твар новабудоўляў ў кожным чорным шкле ў кожным дамафоне эрас і танатас паляць трансфарматар эрас і танатас два дэгенераты эрас і танатас курыць траўматолаг ў кожным кабінеце тлее душаў кратар эрас і танатас злучаныя жалем эрас і танатас чыйсьці лёс аджалі эрас і танатас бач як каратнула ў кожным чорным шкле новыя скрыжалі эрас і танатас кружаць па раёне эрас і танатас пагалілі скроні эрас і танатас маюць прадчуванне большае за смерць вартае кахання 21.04.2020 Homiel - 2022