“Пузыр, саломінка і лапаць” — казка класіка беларускай паэзіі Уладзіміра Дубоўкі, аднаго з найвядомейшых і ўлюбёнейшых паэтаў 1920-ых гадоў. Трое персанажаў вырашаюць звязаць разам свой лёс, але падзеі разгортваюцца зусім няпроста... Гэтая казка нарадзілася ў 1950-я гады, у часы "адлігі". Пасля сталінскіх гадоў выжывання ў лагерах і месцах высылкі за несправядлівыя абвінавачванні, паэт пачынае пісаць для дзяцей. Дубоўка стварае аповесці для малых чытачоў і для падлеткаў, піша казкі, перастварае даўнія сюжэты і прыдумляе свае. У кожнай, нават самай простай, на першы погляд, казцы аўтар закладаў складаную этычную задачу, вырашыць якую належыць самім героям. Тэкст чытае: музыка і паэт Алесь Камоцкі. Аніматар казкі: мастак і музыка Андрусь Такінданг. Гэта першая казка з праекту "Казкі на вакацыі", створанага Міжнародным саюзам беларускіх пісьменнікаў.