Самы недаацэнены і адзін з найбольш самабытных калектываў беларускага творчага падзямелля, гурт «Перебор» на гэтым тыдні адыграў вельмі моцны сэт ў клубе «Графіці». Дзецішча мастацкага генія Васіля Пачыцкага, які пры ўсім сваім грамадскім рэспекце дазваляе сабе паванітаваць у грымёрцы (2008 г. -- пасля выступу «Перебора») ці на голай спіне заябошыць няўмелую брэйкерскую вяртуху на халоднай кафлі (2010 г. -- падчас выступу «Кассиопеи»), працягвае сваё няспешнае шэсце на кастылях па задворках шоу-бізу. Як кажа ўдзельнік гурта Фёдар Міхалыч (празваны так з прычыны анамальнага падабенства з Дастаеўскім), «калектыў існуе выключна на алкаголі і трохі на музыцы». І гэта нармалёвая схема для ўсіх годных ўзораў інтуітыўнай творчасці. «Перебор» -- сапраўды вясёлы трэш і вельмі рэдкі акорд у беларускім кантэксце. Дзіўна, чаму ў нас так мала пішуць пра гэты калектыў і яшчэ менш уважліва яго слухаюць.