Гуляш – мясная страва венгерскага паходжання. Але беларускі рэцэпт істотна адрозніваецца ад венгерскага. Наш рэцэпт XVI стагоддзя.. Гуляш – мясная страва венгерскага паходжання. Але беларускі рэцэпт істотна адрозніваецца ад венгерскага. Наш рэцэпт XVI стагоддзя, з каралеўскага стала Стэфана Баторыя. У венграў гуляш – гэта суп, у нас – мясное рагу. Агурочны расол, вішня у страве – выключна смачнае вынаходніцтва беларускіх кухараў. У даўнія часы такую страву маглі дазволіць сабе толькі магнаты альбо каралеўскія асобы. Існуюць дзве версіі, хто і калі пачаў першым гатаваць гэтую страву на беларускіх землях. Паводле адной з іх, гуляш першым стаў дэгуставаць у XIV стагоддзі князь Ягайла, які ажаніўся з польскай каралевай Ядзвігай. Бацька Ядзвігі Людовік 1 Вялікі ўладарыў дзьвюма каронамі: у Польшчы і ў Венгрыі. Паводле другой версіі, гуляш у XVI стагоддзі ў ВКЛ прывезла венгерская пяхота, якая служыла каралю Стэфану Баторыю. Стэфану Баторыю страва спадабалася, і так з’явілася на каралеўскім стале, але з удакладненнем кухараў пры двары на густ Стэфана Баторыя. Дарэчы, гуляш любілі і Радзівілы. У радзівілаўскім рэцэпце выкарыстоўвалася мяса аленя. Гуляш можна падаваць як асобную страву. У нашым рэцэпце ён з грэчкай. Дарэчы, у старадаўнія часы палеткі з квітнеючай грэчкай былі сімвалам Вялікага Княства Літоўскага, а такой вілізарнай колькасці страў з грэчкі, як у нашых продкаў, не ведала ні адна кухня. ІНГРЭДЫЕНТЫ: 800 г ялавічнай выразкі 30 г пшанічнай мукі 100 мл агурочнага расолу 150 мл соку вішні 150 г свежай альбо замарожанай вішні без костак 50 г фундука 30 г імберца ½ чайнай лыжкі молатага цынамону 1/3 чайнай лыжкі молатай гваздзікі чорны молаты перац і соль на смак сланечнікавы алей для смажання ГАТАВАННЕ: Мяса патрэбна парэзаць кубікамі. Памер кавалкаў — дзесьці 5 сантыметраў. І мяса павінна быць сухім. Таму перад тым, як яго парэзаць, трэба абцерці папяровым кухонным ручніком. Пасаліць і паперчыць да таго моманту, як адпраўляць на патэльню. Абкачаць кавалачкі у муцэ. Патэльня павінна быць моцна гарачай. Але алей спачатку наліваем у халодны посуд. Ялавічыну абсмажываем спачатку з аднаго боку 3 хвіліны, потым з другога — столькі ж часу. Дадаем вішню разам з сокам і расол. Накрываем вечкам і тушым яшчэ 10 хвілін. І напрыканцы далучаем спецыі, нацёрты на дробнай тарцы імберац і ачышчаны фундук. Фундук можна таксама абсмажыць на патэльні і крыху здрабніць. Калі не хапае солі, то дасаліць. Падаваць гуляш гарачым. Гатуйце і частуйцеся разам з «Новым часам»! #belarus #гуляш #рецепты #беларускаякухня #традиции #НовыЧас #рэцэпт