З 11 па 15 жніўня мусульмане ў свеце, у тым ліку і ў Беларусі адзначаюць свята Курбан – Байрам. Гэтае свята мусіць быць складовай часткай пілігрымкі (хаджу) ў Меку. Але не кожны мусульманін штораз можа трапіць у Меку, таму паводле канонаў ісламу, мусульмане павінны выконваць кульмінацыйную частку свята там, дзе яны знаходзяцца. Яна пачынаецца на 10-ы дзень 12-га месяца паводле мусульманскага месяцовага календара і звязаная з гісторыяй прарока Ібрагіма, якому Бог наказаў прынесці ў ахвяру свайго сына Ісмаіла, але ў апошні момант на знак прызнання ахвярнасці Ібрагіма дазволіў замяніць ахвяру бараном. Менавіта таму на Курбан-Байрам, назва якога перакладаецца на беларускую мову як свята ахвярапрынашэння, мусульмане забіваюць ахвярную жывёлу – барана, каб ахвяраваць потым частку мяса забітай жывёлы жабракам і тым, хто мае патрэбу. Мульмане жывуць у Беларусі больш за 600 гадоў. Яны з’явіліся тут яшчэ ў часы княжання Вітаўта, абаранялі нашую зямлю пад Грунвальдам, і заўжды жылі ў згодзе з карэннымі жыхарамі. Цяпер, у зносінах з афіцыйнымі беларускімі ўладамі, здараюцца непаразуменні. Паводле сцвярджэння шэйха Алі Варановіча, зараз у Беларусі 24 мусульманскія абшчыны, але агульную колькасць мусульманаў падлічыць досыць складана. Падчас перапісаў насельніцтва не згадваецца веравызнанне, таму сваіх аднаверцаў мусульмане падлічваюць паводле нацыянальнасцяў. Але гэтыя падлікі недакладныя, бо сярод мусульманаў ёсць і беларусы, а некаторыя татары ўжо ахрысціліся ў хрысціянства. Тым не менш, прыблізная колькасць мусульман у Беларусі – каля 50 тысяч. Калі 3 тысяч мусульман жыве ў Гомлі. На святкаванні Курбан-Байраму ў Гомельскай мячэці пабываў кіраўнік мусульман нашай краіны муфтый духоўнага ўпраўлення мусульман Беларусі Алі Варановіч. Гутарка са сп. Варановічам - у інтэрв’ю карэспандэнткі сайта “Гомельская вясна” Ларысы Шчыраковай Аўтар Ларыса Шчыракова, Андрэй Мядзведзеў Відэа Ларыса Шчыракова Гомельская вясна