Участковы інспектар АУСу рэчыцкага раёну Новік прыйшоў дадому да 39-гадовага Дзяніса Барсукова і паведаміў яму, што за ім магчыма будзе ўсталяваны прэвентыўны нагляд (ПН), бо Дзяніс не мае афіцыйнай працы. Падчас размовы на падворку Дзянісавай хаты міліцыянт спытаў яго чаму той не працуе і за што існуе, не маючы афіцыйнай працы. Рэчычанін патлумачыў міліцыянту, што стаіць на ўліку як беспрацоўны на біржы занятасці ўжо некалькі год. У яго былі некалькі спроб уладкавацца на працу, але доўга ён нідзе не змог працаваць, бо па стане здароўя яму супрацьпаказаны большасць прац. Яму, напрыклад, паказана толькі лёгкая праца, але і яна з шэрагам абмежаванняў: нельга шмат нахіляцца, працаваць уначы. Праца вартаўніка яму забаронена, бо Дзяніс меў судзімасці. «Я бы рады працаваць, але пры ўсім жаданні я не магу працаваць фізічна, – тлумачыць сп. Барсукоў, – бо ў мяне цэлы букет сур’ёзных захворванняў: цыроз печані, сярдэчная недастатковасць, парок сэрца І пры гэтым я не маю інваліднасці. Але я ўсё роўна яе дамагаюся, пішу звароты ў Міністэрства аховы здароўя ды шматлікія скаргі на чыноўнікаў ад медыцыны і лекараў, якія ўсімі хітрыкамі пазбаўляюць мяне законнага права на інваліднасць». Што да прычын па якіх міліцыя спрабуе яму зноў прызначыць прэвентыўны нагляд, на яго думку – гэта яго актыўная грамадзянская пазіцыя, метадычнае адстойванне як уласных правоў так і праваў іншых людзей (у тым ліку Дзяніс дапамагае пенсіянерцы Людміле Хлусевіч, якую абвінавачваюць у публічнай абразе міліцыянта). Да таго ж рэчычанін неаднаразова даваў інтэрв’ю розным СМІ наконт бесчалавечных умоў утрымання і катаванняў у папраўчых калоніях, дзе ён з перапынкамі правёў агулам 13 год. Дзянісу Барсукову пасля апошняй адсідкі ў 2017 годзе яшчэ ў заключэнні быў прызначаны судом прэвентыўны нагляд на максімальна магчымы тэрмін – два гады. Але за час яго знаходжання на волі пад наглядам і без яго, у яго аніякіх правапарушэнняў не было. Што такое наогул прэвентыўны нагляд? Гэта пэўнае абмежаванне волі (нельга без дазволу міліцыі пакідаць горад ці краіну, трэба ўначы знаходзіцца абавязкова дома і рэгулярна адзначацца ў міліцыі) для прафілактыкі злачынстваў з боку асобаў, якія раней іх здзяйснялі. Паводле Крымінальнага кодэксу РБ (КК РБ) (арт. 80) ПГ можа быць накладзены на чалавека, які дапусціў небяспечны рэцыдыў злачынстваў, за чалавекам, якому споўнілася 18 года, асуджанаму за злачынства ў складзе групы, за чалавекам, які злосна парушаў вызначаны парадак адбывання пакарання ў калоніях, калі асоба пасля вызвалення два разы і болей прыцягвалася да адміністратыўнай адказнасці. Як мы бачым у гэтым пераліку няма згадкі, пра тое, што падставай накладання прэвентыўнага нагляду можа быць адсутнасць афіцыйнай працы ў грамадзяніна. Са слоў Дзяніса Барсукова, сам візіт участковага інспектара Аляксандра Новіка быў парушэннем закону. Брамка ў двор да Дзяніса была замкнута знутры, таму каб трапіць да яго міліцыянту давялося прасунуць руку ў дзюрку і знутры адкрыць дзвер. Гэта таксама абурыла сп. Барсукова. «Калі ў цябе няма пастановы ні з пракуратары, ні з суду, чаго ты да мяне ломісься?, – эмацыйна рэагуе Дзяніс. – Гэта мая тэрыторыя, прыватная. Калі я патрэбны – ці позву дасылай, ці патэлефануй, а то руку прасунуў і самавольна адкрыў дзвер. І гэта ўжо другі раз. Першы раз яму суседзі адчынілі». Мужчына мае намер паскардзіцца пракурору на дзеянні ўчастковага інспектара, які пранікае на яго тэрыторыю без дазволу і палохае прэвентыўным наглядам. Мы будзем сачыць за развіццём сітуацыі з прэвентыўным наглядам і паведамляць нашым чытачам. Аўтар Ларыса Шчыракова Фота аўтара Відэа Дзяніс Барсукоў Гомельская вясна (https://gomelspring.org/be/news/8621) Наш Тэлеграм-канал (https://t.me/viasnaHomel)