У чацвер 7 верасня ў Будславе адзначаць 240-ю гадавіну пасвячэння касцёла Унебаўзяцця Найсвяцейшай Панны Марыі, які сёння з’яўляецца малой базылікай і Нацыянальным санктуарыем Маці Божай Будслаўскай. Святыню кансэкраваў 7 верасня 1783 года дапаможны біскуп Віленскай дыяцэзіі Францішак Алаізій Юноша Гзоўскі, пра што ў парафіяльным архіве захаваўся адпаведны дакумент з подпісам іерарха, змацаваны сургучнай пячаткай з біскупскім гербам. Урачыстая святая Імша з гэтай нагоды распачнецца ў Нацыянальным санктуарыі Маці Божай Будслаўскай у 18.00. Узначаліць цэлебрацыю арцыбіскуп эмэрыт Тадэвуш Кандрусевіч.