Панегірычны твор 1430 г. http://staryolsa.com/by/gurt/teksty-noty-bel/pakhvala-vitautu-bel.html Словы ананімнага аўтара XV ст., тэкст паводле летапісу Рачынскага ("Полное собрание русских летописей", Т. 35), музыка народная – са зборніка БНТ Балады (Кн. 1. Мн., 1977). Тэкст перададзены гурту "Стары Ольса" гісторыкам Эдвардам Зайкоўскім. Твор выкананы ў скарочаным адаптаваным выглядзе. Транскрыпцыя беларускай фанетыкі праз напісанне і адаптацыя тэкста да мелодыі выканана З.Сасноўскім. "Пахвала Вітаўту" – помнік беларускай панегірычнай прозы XV ст., які быў створаны ў 1430 г. у Смаленску ў асяроддзі мясцовага епіскапа Герасіма. Пахвала напісана ў той час, калі яе галоўны герой быў у зеніце славы і нават збіраўся прымераць каралеўскую карону. У творы ўслаўляецца князь Вітаўт як мудры, усемагутны, з вялікім міжнародным аўтарытэтам валадар, сцвярджаецца погляд на ВКЛ як на галоўны цэнтр аб’яднання ўсходнееўрапейскіх земляў. Ідэйна-творчыя задачы, якія стаялі перад аўтарам, прадвызначылі змест і характар выкладу, урачыста-узнёслы стыль, прыкметную кніжна-славянскую афарбоўку мовы. 1. Князь вялікі Вітаўт Вітаўт княства дзержаў Літоўскае і Рускае І іныя землі многіе 2. У той час Вітаўт прызваў Вітаўт к себе прызваў Караля Якгейла Польскага Ды і Цэзара Рымскага 3. І князя маскоўскага Караля угерскага Князя велікага цверскага І паслы князя рэзанскага 4. Містра прускага Прускага інфлянскага І паслы ад іншыя землі Ды вялікія паслы былі 5. І ардынскія паслы Влахаў ваеводы Ад Вяліка Новагорада І прыйшлі паслы ад Пскова 6. І ўсі тыя госці Ў князя мешкалі Тагды Цэзар Рымскі З Вітаўтам у міласці былі 7. І у Луцку Вітаўт Тыя госці частаваў Дараваў размаітымі Дарамі каштоўнымі 8. Веліка гаспадара Вітаўта слаўнага Іж не можэць выпісаці І о дарэх і о чэсці 9. Землі на вастоцэ Або і на западзе Кланяліся землі князю Велікаму князю Вітаўту 10.Ды цары турэцкі І царагародскі Былі ў ласцэ з Вітаўтам З сільным ды гаспадарам 11.Каралеўства Чэскае Ўгорскае і Польскае Тэж дзержалі чэсць вяліку Слаўну гаспадару Вітаўту 12.І быў Вітаўт сільны Па ўсім землям слаўны І цары і многія князі У двару его служылі