Словы Лявона Вольскага http://lvolski.livejournal.com Як багата ў нас тэматаў Для дакладаў і трактатаў - Вось працуе ў полі трактар, Вось заводы грукацяць. Ну а я, пясняр заўзяты, Зухаваты, небагаты, Пра народных дэпутатаў Буду песню вам спяваць. Быў заўжды на дэпутатаў Наш з табою край багаты. Зазірні ў любую хату - Дэпутаты там сядзяць, А калі не дэпутаты, Значыць, нехта з апарату, З вертыкалі, з падатковай Ці з міліцыі хаця б. Засядае год ад году Частка лепшая народу: То ахоўвае прыроду, То Еўропу закляйміць. Разбіраюцца ў бюджэце, П'юць - дык толькі на банкеце І не болей, чым па дзвесце. Нам бы так з табою піць! Так ад рання да змяркання На павестцы дня пытанні: Як пісаць на прыбіральнях - "Эм" і "жэ" ці "мэ" і "жо", Пра падатак на патлатых, Пра праклятых дэмакратаў І што трэба для парадку Усіх кастрыраваць бамжоў. Дэпутат з народам разам Кролем плавае і брасам. Між спакусаў і абразаў Дэпутацкая душа. І мацнее з кожным разам Недавер народных масаў На чале з рабочым класам Да ЕЭС і ЗША. Дарагія дэпутаты, Вам і хаты, і пасады, Вам палаты і аклады, Вам і цела, і душу. Мы хоць часта ужываем, Вас шануем, паважаем. А як зробімся бамжамі, Не кастрыруйце, прашу!