Пенегірычны твор 1585 г. http://staryolsa.com/by/gurt/teksty-noty-bel/prysviachennie-rycaru-andreju-rymshu-bel.html Словы Яна Казаквовіча. Гэты верш-прысвячэнне Я. Казаковіча надрукаваны сярод тытулаў "Дзесяцігадовай аповесці" А. Рымшы (1585 г.) з подпісам "Аўтару шчыры сябра". Пераклад з польскай мовы А.Дзітрыха. Музыка з "Полацкага сшытку" (кан. XVI – сяр. XVII ст.). Адаптацыя тэкста да музыкі І. Кубліцкага. Ян Казаковіч (Козак) Літвін – польскі паэт і перакладчык, адзін з самых пладавітых віленскіх паэтаў канца XVI — пачатак XVII стст., добры сябра А. Рымшы. "Полацкі сшытак" (іншыя назвы – "Астрамечаўскі рукапіс", "Рукапіс Ягелонскай бібліятэкі 127/56") – зборнік вакальна-інструментальнай свецкай і касцёльнай музыкі, утрымлівае музычныя творы перыяду 1596 – 1680 гг., захоўваецца ў бібліятэцы Кракаўскага Ягелонскага ўніверсітэту. Самы вядомы музычны помнік бытавой музыкі ВКЛ XVII ст. Паводле апошніх даследванняў, гэты зборнік складзены ў кляштары ў Астрамечаве пад Брэстам. У асабістай размове прафесар Адам Мальдзіс заклікаў папулярызаваць навукова карэктную назву – "Астрамечаўскі рукапіс". Бог табе, Андрэю, хай ва ўсім спрыяе, Бо твая навука і мяне займае; Неба ты праславіў собскім парываннем І зямлі слугуеш праз кніжок выданне: Апісаў надвор’е, пра яго выкруты, Што нясе і студзень, а за ім і люты, Між сабой планеты войны як заводзяць, І людзям галовы болем лютым зводзяць. Дзесьці ты гарцуеш між палкоў літоўскіх: Апяваеш бітвы з ворагам маскоўскім, І як Марс галодны сыціцца крывёю, І войскі разводзіць у бакі між бою. Юным ты бяссмерця чыніш напамінак, Старшым даспадобы гэтакі ўчынак, Тое паміж гетманаў сёння заўважаем. Будзьма, вершам пана мы не пагарджаем.