Шанаваць тых, хто дапамагаў беларускаму народу – гэта наш абавязак - такія словы гучалі над магілай амерыканкі Рут Уолер, што на вайсковых могілках у Менску. Традыцыйную акцыю памяці арганізаваў Рух Салідарнасці “Разам”. Прысутныя ўзгадалі пра дзейнасць місіі Арганізацыі аб’яднаных нацый у справе дапамогі і аднаўлення (скарочана ЮНРРА). У склад той місіі ўваходзілі 15 амерыканцаў і 1 грамадзянін Новай Зеляндыі. Місія распаўсюдзіла ў Беларусі больш за 100 тыс. тон харчовых прадуктаў, ратуючы тым самым многіх людзей ад голаду ў паваенныя гады. Сама ж Рут Уолер, якая была сакратаром місіі, памерла ў Менску, маючы 25 гадоў. Кажа арганізатар акцыі памяці Алесь Макаеў: - Дзякуючы Сяргею Мікалаевічу Ханжанкову традыцыйна, з 2010 года, беларусы прыходзяць на магілу Рут Уолер – амерыканскай грамадзянкі, якая ахвяравала жыццё дзеля Беларусі, дзеля дапамогі галадоўцам. Ратуючы падлеткаў, якія танулі, амерыканка захварэла і трагічна загінула. Гэтая гісторыя, на жаль, вядомая толькі вузкаму колу беларускага грамадства. Прычынай смерці Рут Уолер стаўся хуткацечны менінгіт ды запаленне лёгкіх. Да свайго выезду ў Беларусь Рут Уолер была вядомай спартоўкай на Радзіме, чэмпіёнкай па тэнісе ў штаце Каліфорнія. Падрабязней даведацца пра тое, як ЗША ратавалі беларусаў ад пасляваеннага голаду і пра маштабы дапамогі місіі можна ў гэтым кароткім фільме. Адам Завальня, Беларускае Радыё Рацыя, Менск. Фота аўтара, мантаж Тацяны Грачанікавай. http://www.racyja.com/hramadstva/rut-uoler-amerykanka-yakaya-pamerla-d/