Спэктакль Нацыянальнага акадэмічнага тэатру імя Янкі Купалы паводле аднайменнай камэдыі Янкі Купалы. Спэктакль запісаны ў 1981 годзе, падчас юбілейнага 1000-га паказу; пасьля спэктаклю адбылася сустрэча з артыстамі мінулых пастановак. Прэм'ера адбылася ў 1943 годзе. Рэжысэр — Леў Літвінаў Мастак — Барыс Малкін Кампазытар — Яўген Цікоцкі Ролі выконвалі: Паўлінка — Ала Доўгая Якім Сарока, настаўнік — Аляксандар Мароз Сьцяпан Крыніцкі, бацька — Павал Кармунін Альжбэта, маці — Яўгенія Кавалёва Адольф Быкоўскі — Арнольд Памазан Агата, суседка — Галіна Макарава Пранцісь Пустарэвіч, сусед — Здьзіслаў Стома У астатніх ролях — артысты тэатру Звычайную гісторыю пра тое, як дзяўчына абрала сабе жаніха насуперак бацькоўскай волі, Народны паэт Беларусі Янка Купала шчодра аздобіў нацыянальным калярытам і сакавітым народным гумарам. У багатым рэпэртуары Нацыянальнага акадэмічнага тэатру імя Янкі Купалы спэктакль «Паўлінка» заўсёды стаіць асобна. Найстарэйшы спэктакль тэатру карыстаецца вялікай любоўю гледачоў і за доўгія гады свайго існаваньня ператварыўся ў сапраўдную візытоўку, сімбаль Купалаўскай сцэны. Сакрэт такога ўнікальнага посьпеху — у спалучэньні яскравых народных характараў, цікавага сюжэту, народных песень і танцаў, мілагучнай мовы клясіка беларускай літаратуры й выдатнага майстэрства выканаўцаў. За час існаваньня спэктакля ўдзел у ім бралі некалькі пакаленьняў найлепшых артыстаў краіны, а сам ён стаў сапраўднай школай сцэнічнага майстэрства. І менавіта гэтай пастаноўкай у Купалаўскім тэатры штогод адкрываецца новы сезон! Прэм’ера спэктакля ў пастаноўцы заслужанага дзяяча мастацтваў БССР Льва Літвінава адбылася ў 1943 годзе ў горадзе Томску, дзе тэатар знаходзіўся ў эвакуацыі.