Ці пазбегнем Суду Божага? YOUTUBE: Mikalai Kiyka. Шмат хто з нас імкнецца ўцячы ад будучага гневу Госпада ды абмежаваць сваё жыццё толькі зямным грэшным існаваннем. Бо, маўляў, ніхто пэўна не ведае, што будзе там, за “даляглядам”… Але. Але, ад Бога ўцячы немагчыма. Ён – Усюды Існы. І яшчэ Давід кажа: “Куды пайду ад Духа Твайго, ад аблічча Твайго куды ўцяку?...” (Пс. 138). І Бог праз усё Сваё слова, праз усю Біблію, кажа нам: “Ад Майго, Суду Божага, уцячы немагчыма!” Мы, чалавекі, спрабуем уцячы ад Бога яшчэ з часоў Адама ды Евы. І вынікі гэтага нашага жыцця ва ўцёках – поўнае банкруцтва роду чалавечага ў сэнсе нашай прыдатнасці для існавання ў гэтым Сусвеце, створаным Богам праз Ісуса Хрыста. І прычына такога стану нашага ў тым, што “…ўсе зграшылі і пазбаўлены славы Божай,…” (Рым. 2:23). А за грэх, як ведаем са Слова, прысуд адзіны – смерць! Дык як жа пазбегнуць такога прысуду Божага? – Заплаціць! І гэтую плату ажыццявіў замест нас на крыжы Галгофы Ісус Хрыстос! Але якія адносіны мы, грэшныя людзі, маем да гэтай ахвяры Хрыста? Бог праз Сваё слова, вуснамі Ісуса Хрыста, пераконвае нас, што кожны, хто верыць у Сына Яго, Ісуса Хрыста, не гіне, а мае жыццё вечнае; кожны, хто верыць у Хрыста, не судзіцца!: “Праўду, праўду кажу вам: слухаючы слова Маё і веруючы ў паслаўшага Мяне, мае жыццё вечнае і на Суд не прыходзіць, але перайшоў ад смерці ў жыццё.” (Яна, 5:24) Алілуя! Амін. Казань прамаўлялася на сходзе вернікаў у царкве "Святы Крыж" 03 лютага 2017 года. Мікалай Кійка.